सेवा संकल्प अभियानातून चालक-वाहक व रिक्षाचालकांना मार्गदर्शन दहिवडी येथे ऊस वाहतूक करणाऱ्या वाहनचालकांना परावर्तकाचे महत्त्व समजावले
सातारा प्रतिनिधी – सेवा संकल्प अभियानांतर्गत दहिवडी (ता. माण) येथील एसटी बस आगारात चालक व वाहकांना प्रवासी सेवा, सुरक्षित वाहनचालक आणि प्रवाशांशी सौजन्यपूर्ण व्यवहाराबाबत मार्गदर्शन करण्यात आले. उपप्रादेशिक परिवहन अधिकारी सचिन विधाते यांनी बस आगारास भेट देऊन चालकांच्या कामकाजाची माहिती घेतली तसेच उत्कृष्ट काम करणाऱ्या चालकांचा सत्कार केला.
यावेळी वाहन चालविताना प्रवाशांशी संयमाने व सौजन्याने संवाद साधण्याचे आवाहन करण्यात आले. ‘डोक्यावर बर्फ आणि जिभेवर साखर’ ठेवून प्रवाशांशी सकारात्मक व सहकार्याची भूमिका ठेवावी, असे मार्गदर्शन चालक व वाहकांना करण्यात आले.
मोटार वाहन निरीक्षक शफिक उचगावकर यांनी एसटी महामंडळात दाखल झालेल्या नवीन बसेसची योग्य पद्धतीने हाताळणी, वाहनाची सुरक्षितता आणि चालक-वाहकांनी घ्यावयाची दक्षता याबाबत माहिती दिली.या उपक्रमासाठी माण तालुक्याचे तथा सध्या सातारा प्रादेशिक परिवहन कार्यालयातील उपप्रादेशिक परिवहन अधिकारी गजानन ठोंबरे तसेच माण तालुक्यातील सामाजिक कार्यकर्ते व राज्यस्तरीय हॉलीबॉल खेळाडू विकास गायकवाड यांचे मोलाचे सहकार्य लाभले.
