बॉलीवूड ज्येष्ठ अभिनेते प्रदीप रावत यांचे वयाच्या ७४ व्या वर्षी निधन
बॉलीवूड प्रतिनिधी
भारतीय चित्रपटसृष्टीतील प्रभावी खलनायकांपैकी एक आणि ‘गजनी’ चित्रपटातील ‘गजनी धर्मात्मा’ या अजरामर भूमिकेमुळे घराघरात पोहोचलेले ज्येष्ठ अभिनेते प्रदीप रावत यांचे वयाच्या ७४ व्या वर्षी निधन झाले. गेल्या पाच वर्षांपासून ते ब्लड कॅन्सरसारख्या गंभीर आजाराशी झुंज देत होते. त्यांच्या निधनाने भारतीय चित्रपटसृष्टीने एक दमदार चरित्र अभिनेता आणि खलनायकी भूमिकांचा हुकमी एक्का गमावला आहे.
२१ जानेवारी १९५२ रोजी मध्य प्रदेशातील जबलपूर येथे जन्मलेल्या प्रदीप रामसिंह रावत यांना लहानपणापासूनच रंगभूमीची आवड होती. स्थानिक नाटकांमधून अभिनयाची सुरुवात केल्यानंतर ते मुंबईत आले. १९८५ मध्ये ‘मेरी जंग’ चित्रपटातून त्यांनी रुपेरी पडद्यावर पदार्पण केले. त्यानंतर बी. आर. चोप्रा यांच्या ‘महाभारत’ मालिकेतील ‘अश्वत्थामा’ या भूमिकेने त्यांना मोठी लोकप्रियता मिळवून दिली
त्यांच्या कारकिर्दीतील सर्वात मोठा टप्पा ठरला तो ‘गजनी’. तमिळ आणि हिंदी अशा दोन्ही आवृत्त्यांमध्ये त्यांनी साकारलेला ‘गजनी धर्मात्मा’ हा भारतीय सिनेमातील सर्वाधिक लक्षात राहणाऱ्या खलनायकांपैकी एक मानला जातो. ‘सरफरोश’, ‘लगान’, ‘बादशाह’, ‘आवारा पागल दीवाना’ यांसह हिंदी, तेलगू, तमिळ, कन्नड, मल्याळम, बंगाली आणि भोजपुरी चित्रपटांमध्येही त्यांनी प्रभावी भूमिका साकारल्या
पडद्यावर धाकदायक वाटणारे प्रदीप रावत प्रत्यक्ष आयुष्यात मात्र अत्यंत शांत, शिस्तप्रिय आणि मनमिळावू होते. ‘अश्वत्थामा’पासून ‘गजनी धर्मात्मा’पर्यंतचा त्यांचा अभिनयप्रवास भारतीय चित्रपटसृष्टीत कायम स्मरणात राहील. या अष्टपैलू आणि अविस्मरणीय कलाकाराला भावपूर्ण श्रद्धांजली.
