देशसेवेच्या त्यागाला स्नेहाची ओंजळ; सातारा जिल्ह्यात माजी सैनिकांसोबत उत्साहात संपन्न झाला दिवाळीचा स्नेहमेळावा* *पालकमंत्री शंभूराज देसाई यांच्या संकल्पनेतून साताऱ्यात प्रथमच सैनिक आणि माजी सैनिकांसाठी आयोजित दिवाळी फराळ सोहळा उत्साहात पार पडला**
सातारा, प्रतिनिधी: देशाच्या सीमेवर अहोरात्र पहारा देत ऊन, वारा, पाऊस आणि प्रत्येक प्रतिकूल परिस्थितीची पर्वा न करता मातृभूमीचे रक्षण करणाऱ्या वीर जवानांच्या त्यागाप्रती कृतज्ञता व्यक्त करण्यासाठी यंदाची दिवाळी सातारा जिल्ह्यात एका आगळ्यावेगळ्या आणि भावस्पर्शी वातावरणात साजरी झाली. देशसेवेच्या कर्तव्यामुळे कुटुंबापासून दूर राहून सण-उत्सव साजरे करणाऱ्या सैनिक व माजी सैनिकांच्या चेहऱ्यावर आनंद फुलविण्यासाठी साताऱ्यात प्रथमच आयोजित करण्यात आलेल्या दिवाळी फराळ सोहळ्याला उत्स्फूर्त प्रतिसाद मिळाला.
माजी सैनिक कल्याण मंत्री तथा पालकमंत्री शंभूराज देसाई यांच्या संकल्पनेतून हा विशेष स्नेहसोहळा आयोजित करण्यात आला होता.देशासाठी आपल्या आयुष्याची अनमोल वर्षे समर्पित करणाऱ्या सैनिकांच्या त्यागाचा सन्मान करणे, त्यांच्या कुटुंबीयांशी आपुलकीचे नाते घट्ट करणे आणि ‘समाज सदैव आपल्या पाठीशी आहे,’ याची जाणीव करून देणे हा या उपक्रमामागील मुख्य उद्देश होता.
दिवाळी हा आनंद, प्रकाश आणि आप्तांसोबत एकत्र येण्याचा सण आहे. परंतु, सीमेवर तैनात असलेल्या जवानांना अनेकदा कुटुंबापासून दूर राहावे लागते. घरातील फराळ आणि आप्तस्वकीयांचा सहवास यांपासून दूर राहणाऱ्या सैनिकांसोबत हा आनंद वाटून घेण्याचा हा उपक्रम अत्यंत प्रेरणादायी ठरला.हा विशेष दिवाळी फराळ सोहळा महासैनिक हॉल अँड लॉन्स, टीसीपीसी, करंजे नाका, सातारा येथे मोठ्या उत्साहात संपन्न झाला.सैनिक कल्याण आणि मराठी महामंडळ, पुणे, महाराष्ट्र यांच्या संयुक्त विद्यमाने या कार्यक्रमाचे यशस्वी आयोजन करण्यात आले होते.
या कार्यक्रमादरम्यान उपस्थित माजी सैनिक आणि त्यांच्या कुटुंबीयांनी एकत्र येत एकमेकांना दिवाळीच्या मनःपूर्वक शुभेच्छा दिल्या. फराळाचा आस्वाद घेतल्यानंतर झालेल्या संवादाने उपक्रमातील आपुलकी अधिकच दृढ झाली. सैनिकांच्या कार्याचा गौरव करत उपस्थित मान्यवरांनी त्यांच्या त्यागाला व समर्पणाला मानाचा मुजरा अर्पण केला.
देशाच्या रक्षणासाठी योगदान देणाऱ्या सैनिकांप्रती कृतज्ञता व्यक्त करणारा हा उपक्रम केवळ एका फराळापुरता मर्यादित न राहता समाज आणि सैनिक यांच्यातील जिव्हाळ्याचे नाते अधिक दृढ करणारा ठरला. सैनिकांच्या त्यागाची आठवण ठेवून त्यांच्या आनंदात सहभागी होत साताऱ्यातील जनतेने घडवलेला हा सोहळा सामाजिक संवेदनशीलतेचा एक सुंदर व प्रेरणादायी आदर्श ठरला आहे.
000
