जिल्हास्तरीय अल्पसंख्याक कल्याण समितीवर अशासकीय सदस्य निवडीसाठी अर्ज करण्याचे आवाहन
जालना, प्रतिनिधी: राज्यातील अल्पसंख्याक समाजाच्या सामाजिक, शैक्षणिक आणि आर्थिक उन्नतीसाठी तसेच स्थानिक स्तरावरील समस्या तातडीने सोडविण्यासाठी राज्य शासनाच्या निर्णयानुसार जालना जिल्हास्तरीय अल्पसंख्याक कल्याण समिती स्थापन करण्यात येत आहे. या समितीवर जिल्ह्यातील अल्पसंख्याकांसाठी कार्य करणाऱ्या तीन नामवंत अशासकीय स्वयंसेवी संस्थांच्या प्रतिनिधींची निवड करण्यात येणार असून, त्यासाठी इच्छुकांकडून अर्ज मागविण्यात आले आहेत.
शासन निर्णय दि. 15 एप्रिल 2017 व दि. 19 जानेवारी 2026 अन्वये ही समिती गठीत करण्यात येत आहे. या समितीवर अशासकीय सदस्य म्हणून नामनिर्देशन शासनास पाठविण्यासाठी जिल्हास्तरावर प्रस्ताव मागविण्यात येत आहेत.
अल्पसंख्याक समाजाच्या कल्याणासाठी कार्यरत असलेल्या स्वयंसेवी संस्थांच्या इच्छुक प्रतिनिधींनी आपले अर्ज विहित नमुन्यात सादर करावेत. अर्जामध्ये अर्जदाराचे संपूर्ण नाव, पत्ता, जन्म दिनांक, व्यवसाय, शैक्षणिक पात्रता, मोबाइल क्रमांक, ई-मेल आयडी आणि सामाजिक क्षेत्रात केलेल्या कार्याची सविस्तर माहिती नमूद करणे आवश्यक आहे.
इच्छुक सदस्यांनी आपले परिपूर्ण अर्ज दिनांक 4 डिसेंबर 2026 पर्यंत कार्यालयीन वेळेत जिल्हा नियोजन अधिकारी, जिल्हाधिकारी कार्यालय, जालना येथे सादर करावेत, असे आवाहन प्रशासनाच्या वतीने करण्यात आले आहे.-*-*-*-*-*-*-*-*-