बेलापूर, सानपाडा आणि तुर्भे येथील व्यावसायिक मालमत्ता जप्त-नवी मुंबई महापालिकेच्या जप्ती पथकाकडून थकीत मालमत्ताधारकांवर कठोर कारवाई

 

    नवी मुंबई प्रतिनिधी- नवी मुंबई महानगरपालिकेच्या मालमत्ता कर विभागामार्फत थकबाकीदारांविरोधात जप्तीची कठोर कारवाई सुरु करण्यात आली असून ही मोहिम अधिक वेगाने राबविण्यात येत आहे. 22 जानेवारी रोजीच्या 3 मालमत्ता जप्ती कारवायांनंतर शुक्रवार दिनांक 23 जानेवारी 2026 रोजी बेलापूर सीबीडी येथील सेक्टर 11, सानपाडा येथील सेक्टर 24 आणि तुर्भे येथील सेक्टर 19 इ येथील व्यावसायिक मालमत्तांवर महापालिकेची जप्ती कारवाई करण्यात आली आहे.

          नवी मुंबई महानगरपालिकेचे आयुक्त तथा प्रशासक डॉ. कैलास शिंदे यांच्या निर्देशानुसार, अतिरिक्त आयुक्त श्री. सुनील पवार व उपायुक्त डॉ.अमोल पालवे यांच्या मार्गदर्शनाखाली शहरामध्ये विविध भागांतील दीर्घकाळ कर थकीत असलेल्या मालमत्तांवर जप्ती पथकाकडून थेट सील व जप्तीची कारवाई करण्यात येत आहे.

          वारंवार सूचना व नोटिसा बजावूनही जे मालमत्ताधारक मालमत्ताकर भरण्यास टाळाटाळ करीत आहेत, अशा थकबाकीदारांवर कोणतीही सवलत न देता कठोर कारवाई करण्यात येत आहे. येत्या काळातही ही मोहीम अधिक गतिमान स्वरूपात सुरू राहणार आहे. तसेच जप्तीची कारवाई टाळण्यासाठी मालमत्ता कर थकबाकी असलेल्या सर्व मालमत्ताधारकांनी तात्काळ आपला थकीत मालमत्ता कर भरावा असे आवाहन नवी मुंबई महानगरपालिकेच्या वतीने करण्यात आले आहे.

000000