नवी मुंबई विमानतळावर राष्ट्रीय आपत्ती रंगीत तालीम

 

 रायगड- प्रतिनिधी:-आपत्ती व्यवस्थापनाच्या दृष्टीने सज्जता वाढविण्यासाठी नवी मुंबई आंतरराष्ट्रीय विमानतळ परिसरात दि. ९ एप्रिल २०२६ रोजी आपत्कालीन रंगीत तालीम (मॉक एक्सरसाइज) आयोजित करण्यात आली आहे. ही तालीम राष्ट्रीय आपत्ती व्यवस्थापन प्राधिकरण, नवी दिल्ली, राज्य आपत्ती व्यवस्थापन प्राधिकरण, मुंबई, जिल्हा आपत्ती व्यवस्थापन प्राधिकरण, रायगड तसेच नवी मुंबई आंतरराष्ट्रीय विमानतळ व्यवस्थापन यांच्या संयुक्त विद्यमाने पार पडणार आहे.

या रंगीत तालमीमध्ये विविध आपत्तीजन्य परिस्थितींचे प्रतिकात्मक सादरीकरण करून आपत्कालीन प्रतिसाद यंत्रणेची कार्यक्षमता तपासली जाणार आहे. विमान अपघात, आग, वैद्यकीय आपत्कालीन परिस्थिती आदी प्रसंगांवर तात्काळ आणि समन्वयाने कशी कार्यवाही केली जाते, याचा सराव करण्यात येणार आहे

यावेळी पोलीस, अग्निशमन दल, आरोग्य विभाग, आपत्कालीन सेवा यंत्रणा तसेच इतर संबंधित विभागांचा सक्रिय सहभाग राहणार असून, विविध यंत्रणांमधील समन्वय अधिक सक्षम करण्यावर भर दिला जाणार आहे. नागरिकांनी या काळात कोणतीही अफवा पसरवू नये आणि प्रशासनास सहकार्य करावे, असे आवाहन जिल्हा प्रशासनाने केले आहे.

000000