बुलढाणा येथे शेळी, कुक्कुट व पशुपालन प्रशिक्षणाचे आयोजन; सुशिक्षित बेरोजगारांना स्वयंरोजगाराची संधी
बुलढाणा, द प्रतिनिधी: जिल्ह्यातील सुशिक्षित बेरोजगार युवक-युवतींना स्वयंरोजगाराच्या संधी उपलब्ध करून देण्यासाठी महाराष्ट्र उद्योजकता विकास केंद्र (MCED) आणि जिल्हा उद्योग केंद्र, बुलढाणा यांच्या संयुक्त विद्यमाने पाच दिवसीय विशेष प्रशिक्षण कार्यक्रमाचे आयोजन करण्यात आले आहे. हे प्रशिक्षण 25 ते 29 एप्रिल 2026 या कालावधीत बुलढाणा येथे पार पडणार आहे.
प्रशिक्षणाचा उद्देश सुशिक्षित बेरोजगारांनी तंत्रशुद्ध ज्ञान मिळवून स्वतःचा उद्योग/व्यवसाय सुरू करावा हा आहे. प्रशिक्षणादरम्यान शेळीपालन, कुक्कुट व गाय/म्हैस पालनातील आधुनिक तंत्रज्ञान, विविध जाती व त्यांची वैशिष्ट्ये, लसीकरण, रोग व लक्षणे, खाद्य निर्मिती, चाऱ्याचे प्रकार तसेच उद्योग सुरू करण्यासाठी आवश्यक मार्गदर्शन दिले जाणार आहे. याशिवाय उद्योजकता विकास, उद्योग संधी, शासकीय योजनांची माहिती आदी विषयांवर तज्ञ व्यक्तींकडून मार्गदर्शन करण्यात येणार आहे.
प्रशिक्षणासाठी उमेदवार किमान 5 वी उत्तीर्ण, वय 18 वर्षे असावा. प्रशिक्षण यशस्वीपणे पूर्ण करणाऱ्या उमेदवारांना प्रमाणपत्र प्रदान करण्यात येईल. नोंदणी, प्रशिक्षण शुल्क व अधिक माहितीसाठी इच्छुकांनी दि. 25 एप्रिल 2026 पर्यंत कार्यालयीन वेळेत गणेश गुप्ता, प्रकल्प अधिकारी, MCED, जिल्हा उद्योग केंद्र, तहसील कार्यालयाजवळ, चिखली रोड, बुलढाणा येथे किंवा मोबाईल क्रमांक ९०११५७८८५४ / ८२७५०९३२०१ वर संपर्क साधावा, असे आवाहन विभागीय अधिकारी किशोर अंभोरे यांनी केले आहे.
0000
