📰 ‘शिवाजी कोण होता’ या शिवरायांचा अपमान करणाऱ्या पुस्तकावर बंदीची मागणी; संभाव्य मोर्चाच्या पार्श्वभूमीवर पोलीस अधीक्षकांना निवेदन 🚩

 बुलढाणा | प्रतिनिधी-कॉम्रेड गोविंद पानसरे लिखित “शिवाजी कोण होता” या पुस्तकावर बंदी आणून संबंधित प्रकाशक प्रशांत आंबी यांच्यावर कायदेशीर कारवाई करावी, तसेच दिनांक २८/०४/२०२६ रोजी होणाऱ्या संभाव्य मोर्चाच्या पार्श्वभूमीवर कायदा व सुव्यवस्था अबाधित राखण्यासाठी आवश्यक ती खबरदारी घ्यावी, या मागण्यांसाठी बुलढाणा जिल्हा पोलीस अधीक्षक यांना निवेदन सादर करण्यात आले.

आज दिनांक २७ एप्रिल २०२६ रोजी शिवसेना पदाधिकारी, शिवप्रेमी तसेच हिंदुत्ववादी संघटनांच्या वतीने हे निवेदन देण्यात आले. “शिवाजी कोण होता” या पुस्तकावरून सध्या महाराष्ट्रभर तीव्र वाद निर्माण झाला असून, विविध ठिकाणी आंदोलनाची परिस्थिती निर्माण झालेली आहे. या पार्श्वभूमीवर काही संघटना, राजकीय व्यक्ती व त्यांचे समर्थक बुलढाणा जिल्ह्यात येऊन आमदार धर्मवीर श्री संजुभाऊ गायकवाड यांच्या विरोधात आंदोलन, घोषणाबाजी किंवा सभा घेण्याची शक्यता व्यक्त होत आहे.

निवेदनात नमूद करण्यात आले आहे की, छत्रपती श्री शिवाजी महाराज हे महाराष्ट्राच्या अस्मितेचे, स्वाभिमानाचे आणि प्रेरणेचे सर्वोच्च प्रतीक आहेत. त्यांच्या संदर्भात कोणताही अनादर, एकेरी उल्लेख किंवा भावना दुखावणारे विधान झाल्यास समाजात तीव्र प्रतिक्रिया उमटणे स्वाभाविक आहे. सदर पुस्तकातील उल्लेखांबाबत निर्माण झालेल्या भावना लक्षात घेता, आमदार धर्मवीर श्री संजुभाऊ गायकवाड यांनी संबंधितांना जाब विचारत ठाम भूमिका घेतली आहे.

सध्या सुरू असलेल्या आंदोलनाच्या पार्श्वभूमीवर काही ठिकाणी भडकाऊ वक्तव्ये, आक्षेपार्ह भाषा तसेच कायदा व सुव्यवस्था बिघडविण्याचे प्रयत्न होत असल्याचे निदर्शनास येत असल्याने, बुलढाणा जिल्ह्यात कोणताही तणाव निर्माण होऊ नये यासाठी प्रशासनाने विशेष दक्षता घेणे आवश्यक असल्याचे निवेदनात नमूद करण्यात आले.

लोकशाही पद्धतीने प्रत्येकाला आपले मत मांडण्याचा अधिकार आहे; मात्र त्या अभिव्यक्तीतून कोणत्याही व्यक्ती, समाजघटक, लोकप्रतिनिधी किंवा शिवप्रेमींच्या भावना भडकतील असा सूर, भाषा किंवा कृती स्वीकारार्ह नसल्याचे स्पष्ट करत, अशा प्रकारच्या कृत्यांमुळे कायदा व सुव्यवस्थेचा प्रश्न निर्माण होऊ शकतो, असेही निवेदनात म्हटले आहे.त्यानुसार जिल्हा पोलीस प्रशासनाकडे खालील मागण्या करण्यात आल्या—बुलढाणा शहर व जिल्ह्यातील संभाव्य कार्यक्रम, सभा व मोर्चांसाठी पूर्वपरवानगीची काटेकोर अंमलबजावणी करावी.दिनांक २८/०४/२०२६ रोजी होणाऱ्या संभाव्य मोर्चादरम्यान कोणतेही भडकाऊ वक्तव्य, आक्षेपार्ह भाषा किंवा कायदा भंग होणार नाही याची विशेष दक्षता घ्यावी.“शिवाजी कोण होता” या पुस्तकावर तात्काळ बंदी आणून संबंधित प्रकाशक प्रशांत आंबी यांच्यावर कायदेशीर कारवाई करावी.या निवेदनाद्वारे धर्मवीर युथ फाऊंडेशन,शिवप्रेमी, शिवसेनेचे पदाधिकारी व हिंदुत्ववादी संघटनांनी प्रशासनाने तातडीने दखल घेऊन योग्य ती कारवाई करावी, अन्यथा तीव्र आंदोलन छेडले जाईल, असा इशाराही दिला.सदर निवेदन देण्याच्या वेळी शिवसेना पदाधिकारी, शिवप्रेमी तसेच हिंदुत्ववादी संघटनांचे कार्यकर्ते मोठ्या संख्येने उपस्थित होते. 🚩