देशात महिला अत्याचाराच्या घटनांमध्ये प्रचंड वाढ, अल्पवयीन मुलीवर सामूहिक बलात्कार

भोपाळ प्रतिनिधी : मध्य प्रदेशातील  धार जिल्ह्यात गरबा बघून आपल्या चुलत भावासोबत घरी परतणाऱ्या अल्पवयीन मुलीवर सामूहिक बलात्काराची घटना उघडकीस आलीय. पीडित मुलीनं आई आणि भावासह घटनेनंतर दोन दिवसांनी पोलीस स्टेशन गाठलं आणि गुन्हा नोंदवलाय.

पीडित मुलीनं पोलिसांना सांगितलं, की ती तिच्या चुलत भावासोबत घरी जात असताना वाटेत खूप अंधार होता. तो मार्ग दिसत नसल्याने त्यांनी टॉर्चचा वापर केला, तेव्हा गावातील दोन लोकांनी त्यांना पाहिलं आणि धमकी देण्यास सुरुवात केली. त्यानंतर माझ्या चुलत भावाला मारहाण करुन त्याला तिथून हाकलून दिलं आणि माझ्यासोबत जबरदस्ती करण्यास सुरुवात केली. या घटनेची पोलिसांनी दखल घेतली असून आरोपींवर एससी/एसटी अंतर्गत अॅट्रोसिटी गुन्हा (Atrocity Crime) दाखल करण्यात आलाय. सध्या दोन्ही आरोपी फरार असून पोलिस त्यांचा शोध घेत आहेत.

देशात महिला अत्याचाराच्या घटनांमध्ये प्रचंड वाढ झालीय. काही दिवसांपूर्वी महाराष्ट्राची राजधानी असलेल्या मुंबईत बलात्काराची भयानक घटना समोर आली होती. या घटेनेनं दिल्लीत घडलेल्या महाभयंकर निर्भया हत्याकांडाची आठवण करुन दिली होती. त्यापाठोपाठ डोंबिवलीत एका अल्पवयीन मुलीवर 30 पेक्षा जास्त जणांनी बलात्कार केल्याची धक्कादायक घटना समोर आली होती. याशिवाय, देशभरात बलात्कार आणि महिला अत्याचाराच्या अनेक घटना वारंवार समोर येताना दिसत आहेत. सरकार कडक कारवाई आणि कडक कायदे करण्याचा दावा करतं. मात्र, अशा घटना थांबताना दिसत नाहीत. वेगवेगळ्या राज्यांतून येणाऱ्या बलात्काराच्या घटना महिलांच्या सुरक्षा व्यवस्थेवरील सरकारच्या दाव्यांवर प्रश्नचिन्ह उपस्थित करत आहेत.