ऊसतोड मजूरांच्या पालांवर बालसंजीवनी अभियान राबवण्याचे राज्यमंत्री मेघना बोर्डीकर यांचे निर्देश*बालकांची होणार विशेष तपासणी*
परभणी, प्रतिनिधी : राज्यातील उसतोड मजूरांच्या बालकांची विशेष आरोग्य तपासणी करण्याचे निर्देश राज्याच्या आरोग्य राज्यमंत्री मेघना साकोरे बोर्डीकर यांनी दिले आहेत. यासाठी आरोग्य विभागाचे बालसंजीवणी हे विशेष अभियान राबवले जाणार असून कारखाना परिसर, उस तोड शेती या ठिकाणी जावून बालकांना आरोग्य सुविधा उपलब्ध करून दिल्या जाणार आहेत.
राज्यातील विविध भागातील साखर कारखाण्यांचे गाळप हंगाम सुरू झाले आहेत. उसतोड करण्यासाठी मजूर घराबाहेर पडले असून त्यांचे तात्पुरते विसावे कारखाना परिसर आणि शेत वस्त्यांवर तयार झाले आहेत. उसतोड मजूरांसोबत त्यांचे अल्पवयीन पाल्यही मोठ्या संख्येने असतात. या पाल्यांना आवश्यक त्या आरोग्य सुविधा त्या त्या ठिकाणी मिळण्याची शक्यता कमी असल्याने आरोग्यांकूर ही विशेष मोहीम राबविण्यात येत असल्याचे राज्यमंत्री मेघना बोर्डीकर यांनी स्पष्ट केले आहे.
राष्ट्रीय बाल स्वास्थ्य कार्यक्रम ( RBSK ) अंतर्गत स्थलांतरीत असलेल्या प्रत्येक बालकाची आरोग्य तपासणी केली जाणार आहे. कुपोषण, रक्तक्षय, बालविकासातील विलंब, जन्मजात व्यंग, संसर्गजन्य आजार आदिंबाबत तपासण्या करून आवश्यक ते उपचार केले जातील. याकामी त्या त्या भागातील आरोग्य कर्मचारी, आरोग्य सेवक, आशा स्वयंसेविका, अंगणवाडी सेविका, संबंधित कारखाना व्यवस्थापन यांना सहभागी करून घेतले जाणार आहे. यासाठी राज्यातील सर्व साखर कारखान्यांच्या याद्या तयार करणे, कामगारांच्या पालांचे – तात्पुरत्या वस्त्यांचे सर्वेक्षण करणे, याच ठिकाणी आवश्यक ते लसीकरण करणे आदिंबाबत राज्याच्या प्रधान सचिवांना मेघना बोर्डीकर यांनी लेखी निर्देश दिले आहेत. उसतोड मजुरांची फरफट थांबवणे हा उद्देश – राज्यमंत्री मेघना बोर्डीकर उसतोड करण्यासाठी मजूर अनेक दिवस घराबाहेर असतात. त्यांच्या सोबत असणाऱ्या बालकांच्या आरोग्याची काळजी घेणे, त्यांच्या लसीकरणासाठी आरोग्य केंद्रावर जाणे मजुरांना शक्य होत नाही. कामाच्या व्यापात मजूर त्याकडे लक्षही देवू शकत नाहीत. ही बाब ध्यानात घेवून ही विशेष मोहीम राबवली जात आहे. उसतोड मजूरांची पाल्याच्या आजारावेळी होणारी फरफट थांबवणे व त्यांच्या पाल्यांना सुदृढ आरोग्य प्रदान करणे, हा बालसंजीवणी मोहिमे मागचा मुख्य उद्देश असल्याचे राज्यमंत्री मेघना बोर्डीकर यांनी सांगितले.
*-*-*-*-*-*
