राजकीय पक्ष व उमेदवारांनी इलेक्ट्रॉनिक माध्यमातून जाहिरात प्रसारणासाठी पूर्वप्रमाणन करणे आवश्यक..

       नवी मुंबई प्रतिनिधी-   नवी मुंबई महानगरपालिका सार्वत्रिक निवडणूक 2025 मध्ये प्रचार, प्रसिध्दीकरीता राजकीय पक्ष व उमेदवार यांच्याकडून विविध माध्यमांचा वापर करण्यात येईल. यामध्ये आदर्श आचार संहितेचे पालन व्हावे व मा.राज्य निवडणूक आयोग महाराष्ट्र यांनी जाहीर केलेल्या मार्गदर्शक सूचनांनुसार प्रचार, प्रसार व्हावा या करिता आयोगाच्या दि. 09 ऑक्टोबर 2025 रोजीच्या ‘निवडणूकांच्या प्रयोजनार्थ प्रसारमाध्यम सनियंत्रण व जाहीरात प्रमाणन आदेश 2025’ या अधिसूचनेनुसार नवी मुंबई महानगरपालिकेच्या वतीने कार्यवाही करण्यात येत आहे.

   या अनुषंगाने सदर अधिसूचनेनुसार महानगरपालिकास्तरीय माध्यम प्रमाणन आणि संनियंत्रण समिती नमुंमपा आयुक्त डॉ. कैलास शिंदे यांच्या अध्यक्षतेखाली स्थापन करण्यात आलेली आहे. या समितीमध्ये अतिरिक्त आयुक्त श्री.सुनिल पवार, पोलीस उपआयुक्त (विशेष शाखा) श्रीम.रश्मी नांदेडकर, मुख्य लेखा व वित्त अधिकारी तथा नोडल अधिकारी श्री. सत्यवान उबाळे हे समिती सदस्य आहेत.

   निवडणूकीमध्ये कोणत्याही राजकीय पक्षास अथवा उमेदवारास दूरदर्शन, उपग्रह वाहिन्या, केबल वाहिन्या, यू ट्युब वाहिन्या, केबल नेटवर्क, आकाशवाणी, खाजगी एफ.एम.वाहिन्या, सिनेमागृह, सार्वजनिक ठिकाणचे ऑडिओ – व्हिज्युअल डिस्प्ले, ई-वृत्तपत्रे, बल्क एसएमएस, व्हॉईस एसएमएस, समाजमाध्यमे, संकेतस्थळे अशा कोणत्याही प्रकारच्या इलेक्ट्रॉनिक माध्यमांव्दारे जाहीरात प्रसारित / प्रसिध्द करावयाची असल्यास त्या प्रस्तावित जाहिरातींचे समितीकडून ‘पूर्वप्रमाणन’ म्हणजे ‘प्रसिध्दी अथवा प्रसारणापूर्वी मान्यता घेणे’ आवश्यक आहे. पूर्वप्रमाणन केले नसल्यास त्या जाहिरातीचे प्रसारण / प्रसिध्दी करता येणार नाही याची नोंद घ्यावयाची आहे.    जाहिरात पूर्वप्रमाणनासाठी जाहिरात प्रसारित / प्रसिध्द करावयाच्या दिनांकापूर्वी कार्यालयीन कामकाजाच्या किमान 5 दिवस आधी समितीकडे ‘परिशिष्ट – 4’ नुसार अर्ज करावयाचा आहे.

          सदर अर्ज नमुना प्रत नवी मुंबई महानगरपालिका मुख्यालयात तिस-या मजल्यावर माहिती व जनसंपर्क विभागातील माध्यम निरीक्षण कक्षामध्ये उपलब्ध होईल व ते अर्ज त्याच ठिकाणी आवश्यक कागदपत्रांसह जमा करावयाचे आहेत.

          अर्जासोबत प्रसारित करावयाच्या जाहिरातीच्या इलेक्ट्रॉनिक स्वरूपातील प्रती या 2 पेन ड्राईव्हमध्ये, राजकीय पक्षाच्या पदाधिका-याने किंवा उमेदवाराने साक्षांकित केलेल्या 2 मुद्रित प्रतींसह (प्रिंट्स) जमा करावयाच्या आहेत.

          निवडणूकविषयक जाहिरातींवर राजकीय पक्षाने खर्च केला असल्यास त्याचा समावेश पक्षाच्या; तर उमेदवाराने खर्च केला असल्यास त्याचा समावेश उमेदवाराच्या निवडणूक खर्चात करणे आवश्यकक आहे.

          खालील स्वरूपाच्या आशयाचा समावेश असलेल्या जाहिराती प्रसारित / प्रसिद्ध करता येणार नाहीत व अशा स्वरुपाच्या जाहिरातींचे पूर्वप्रमाणनही केले जाणार नाही याची विशेष नोंद घ्यावयाची आहे. यामध्ये –

 

(क) भारतीय संविधानाची पायमल्ली, केंद्र/ राज्य शासनाच्या कायद्यांचे उल्लंघन,(ख) राज्य निवडणूक आयोगाच्या आदेशांची पायमल्ली,(ग) धर्म, वंश, जात, लिंग, भाषा, पेहराव इत्यादींच्या आधारे तेढ अथवा शत्रुत्वाची शक्यता,(घ) प्रार्थना स्थळांचे छायाचित्र / छायाचित्रणाचा समावेश,(ङ) कायदा व सुव्यवस्थेला आव्हान, हिंसेला प्रोत्साहन, शांततेचा भंग,(च) न्यायालयाचा अथवा एखाद्या व्यक्ती किंवा संस्थेची बदनामी,(छ) देशाच्या ऐक्याला, सार्वभौमत्वाला आणि राष्ट्रीय एकात्मतेला बाधा.ज) अन्य कुठल्याही देशावर टिका, अवमानजनक टिप्पणी अथवा तिरस्कारपूर्ण विधान,(झ) संरक्षण दलाच्या अधिकारी / कर्मचारी अथवा संरक्षण दलाचे छायाचित्र / छायाचित्रण,(ञ) राजकीय पक्ष, राजकीय नेता किंवा अन्य कोणावरही खोटे आरोप,(ट) कुठल्याही राजकीय नेत्याच्या अथवा व्यक्तीच्या खाजगी आयुष्यात हस्तक्षेप,(ठ) नीतिमत्ता व सभ्यतेचे उल्लंघन,(ड) अश्लिलतेला प्रोत्साहन- अशा बाबींचा समावेश आहे. जाहिरात बनविताना व त्या प्रमाणनासाठी पाठविण्यापूर्वी वरील बाबींची खात्री करून घ्यावी, जेणेकरून कालापव्यय होणार नाही असे सूचित करण्यात येत आहे.     जाहिरात प्रसारण / प्रसिद्धीसाठी येणाऱ्या खर्चाची सर्व देयके, धनादेश/ धनाकर्ष / ऑनलाईन पद्धतीने अदा करण्यात येतील. कुठल्याही परिस्थितीत ही देयके रोकड स्वरूपात अदा करण्यात येणार नाही.

          मराठी, हिंदी आणि इंग्रजी भाषेव्यतिरिक्त अन्य भाषेतील प्रस्तावित जाहिरातीचे पूर्वप्रमाणन करण्यासाठी अर्ज सादर करताना संबंधित भाषेतील जाहिरातीच्या इलेक्ट्रॉनिक स्वरूपातील दोन प्रती द्याव्यात. त्याचबरोबर त्या जाहिरात संहितेचा मराठी, हिंदी किंवा इंग्रजी भाषेत अनुवाद करून राजकीय पक्षाच्या पदाधिकाऱ्याने किंवा उमेदवाराने साक्षांकित केलेल्या जाहिरात संहितेच्या दोन मुद्रित प्रती (प्रिंट) जोडाव्यात. त्यासोबत “सदर प्रस्तावित जाहिरातीचा मराठी/ हिंदी / इंग्रजी भाषेत यथार्थ अनुवाद करण्यात आला असून, कोणत्याही चुकांकरिता अर्जदार जबाबदार असेल, असे निश्चयपूर्वक कथन करण्यात येत आहे,” असे नोटराईज्ड प्रतिज्ञापत्र ‘परिशिष्ट- ५’ प्रमाणे सादर करणे आवश्यक असेल.

          प्रस्तावित जाहिरात पूर्वप्रमाणनाचा अर्ज प्राप्त झाल्यानंतर तो कार्यालयीन कामकाजाच्या ३ दिवसांच्या आत संबंधित समिती निकालात काढेल.

          अर्ज निकाली काढताना समिती, जाहिरातीचा कोणताही भाग वगळेल अथवा फेरबदल करेल किंवा दुरूस्ती सूचवेल त्यानुसार कार्यवाही करणे संबंधित राजकीय पक्ष उमेदवार/अर्जदारावर बंधनकारक असेल.

          प्रस्तावित जाहिरातीचे संबंधित समितीने पूर्वप्रमाणन केले नसल्यास, अशा जाहिरातीचे प्रसारमाध्यमांना प्रसारण / प्रसिद्धी करता येणार नाही.  नवी मुंबई महानगरपालिका सार्वत्रिक निवडणूक 2025-26 ही दि. 15 जानेवारी 2026 रोजी होत असून या निवडणूका मुक्त, निर्भय, पारदर्शक, नि:पक्षपातीपणे पार पडण्याकरीता सर्व माध्यमांवर जाहिरात प्रसारण, प्रसिध्दी व प्रचार याबाबत मा. राज्य निवडणूकाने निश्चित केलेल्या कार्यपध्दतीचे राजकीय पक्ष व उमेदवार तसेच प्रचार – प्रसिध्दी करणा-या सर्व प्रसार माध्यमांनी पालन करावे असे आवाहन करण्यात येत आहे.

00000