क्रांती चौक ते जिल्हा परिषद मैदान ‘महा वॉकेथॉन – वॉक फॉर वॉटर’शुक्रवारी (दि.21) आयोजन, नागरिकांना सहभागाचे आवाहन

छत्रपती संभाजीनगर, प्रतिनिधी- मृद व जलसंधारणाबाबत जनजागृती करण्यासाठी शुक्रवार, दि.21 रोजी छत्रपती संभाजीनगर शहरात ‘महा वॉकेथॉन – वॉक फॉर वॉटर’ या उपक्रमाचे आयोजन करण्यात आले आहे. या उपक्रमात नागरिकांनी उत्स्फूर्त सहभाग घ्यावा असे आवाहन करण्यात आले आहे.

 शुक्रवार दि. 21 रोजी सकाळी 6 वा. क्रांती चौक येथून वॉकेथॉनला प्रारंभ होऊन जिल्हा परिषद मैदान येथे समारोप होईल, अशी माहिती जिल्हा जलसंधारण अधिकारी, मृद व जलसंधारण विभाग यांनी दिली आहे.

माजी मुख्यमंत्री स्व. सुधाकरराव नाईक यांच्या जन्मदिनानिमित्त 21 ऑगस्ट हा ‘जलसंधारण दिन’ म्हणून साजरा करण्याचा निर्णय शासनाने घेतला आहे. त्यानुषंगाने दि. 15 ते 21 ऑगस्ट या कालावधीत ‘जलसंधारण सप्ताह’ तसेच दि. 15 ऑगस्ट 2026 ते 26 जानेवारी 2027 या कालावधीत ‘जलसंधारण अभियान’ राबविण्यात येत आहे. माती व पाण्याच्या संवर्धनाचे महत्त्व नागरिकांपर्यंत पोहोचविणे आणि जलसंवर्धनाला व्यापक लोकसहभाग मिळवून देणे हा या उपक्रमाचा उद्देश आहे. राज्यभर दि. 21 रोजी ‘महा वॉकेथॉन – वॉक फॉर वॉटर’चे आयोजन करण्यात येणार आहे.

छत्रपती संभाजीनगर शहरात वॉकेथॉनचा मार्ग क्रांती चौक – पैठण गेट – तिलकपथ रोड मार्गे डावीकडे – पोलीस चौकी – गुलमंडी – जिल्हा परिषद मैदान असा निश्चित करण्यात आला आहे.

जिल्ह्यातील सर्व नागरिक, शासकीय विभागांचे अधिकारी व कर्मचारी यांनी वॉकेथॉनमध्ये उत्स्फूर्त सहभाग नोंदवावा. असे आवाहन जिल्हा जलसंधारण अधिकारी नरेंद्र कटके यांनी केले आहे.

00000