vishwatmaklokswamivarta
Breaking News
ठळक बातम्याप्रदेश

उत्तराखंड, झारखंडच्या संस्कृतीतून राष्ट्रीय एकात्मतेचे दर्शन – राज्यपाल जिष्णु देव वर्मा ‘एक भारत श्रेष्ठ भारत’च्या भावनेतून विविध राज्यांच्या संस्कृतीचा आदर आणि परस्पर संबंध दृढ करणे आवश्यक

उत्तराखंड, झारखंडच्या संस्कृतीतून राष्ट्रीय एकात्मतेचे दर्शन – राज्यपाल जिष्णु देव वर्मा  ‘एक भारत श्रेष्ठ भारत’च्या भावनेतून विविध राज्यांच्या संस्कृतीचा आदर आणि परस्पर संबंध दृढ करणे आवश्यक

मुंबई, प्रतिनिधी : भारताची सांस्कृतिक विविधता हीच आपली शक्ती असून, विविध राज्यांच्या संस्कृतीचा आदर, परस्पर समन्वय आणि बंधुभावातून राष्ट्रीय एकात्मता अधिक दृढ झाली पाहिजे. ‘एक भारत श्रेष्ठ भारत’ या संकल्पनेचा उद्देश केवळ राज्यांचे स्थापना दिन साजरे करणे नसून, एकमेकांची संस्कृती समजून घेणे आणि परस्पर संबंध दृढ करणे हा आहे, असे प्रतिपादन राज्यपाल जिष्णु देव वर्मा यांनी केले.

 

उत्तराखंड आणि झारखंड राज्यांच्या स्थापना दिनानिमित्त लोकभवनातील दरबार हॉल येथे आयोजित कार्यक्रमात राज्यपाल बोलत होते. यावेळी उत्तराखंड आणि झारखंडमधील कलाकारांनी दोन्ही राज्यांची समृद्ध लोककला, परंपरा आणि सांस्कृतिक वारसा यांचे दर्शन घडविणारे विविध कार्यक्रम सादर केले. २००० मध्ये तत्कालीन पंतप्रधान भारतरत्न अटल बिहारी वाजपेयी यांच्या नेतृत्वाखाली छत्तीसगड, उत्तराखंड आणि झारखंड या तीन नव्या राज्यांची निर्मिती झाली. उत्तराखंड ही देवभूमी असून बद्रीनाथ, केदारनाथ यांसारखी पवित्र तीर्थक्षेत्रे, आदि शंकराचार्यांची तपोभूमी आणि नैसर्गिक सौंदर्यामुळे या राज्याला आध्यात्मिक व सांस्कृतिक वारशात विशेष स्थान आहे. उत्तराखंडने देशाला अनेक शूर सैनिक आणि लष्करी अधिकारी दिले असून, जनरल बिपिन रावत यांचे देशसेवेतील योगदान उल्लेखनीय आहे, असे राज्यपालांनी सांगितले.

उत्तराखंड आणि महाराष्ट्र यांच्यात विशेष आत्मीयतेचे नाते आहे. माजी राज्यपाल भगतसिंह कोश्यारी यांनी दोन्ही राज्यांमध्ये जनसेवेच्या क्षेत्रात महत्त्वपूर्ण योगदान दिले आहे. महाराष्ट्रात स्थायिक झालेले उत्तराखंडचे नागरिक येथील संस्कृती आणि परंपरांमध्ये समरस झाले असून, अनेक जण मराठी भाषाही उत्तम बोलतात. हा सांस्कृतिक समन्वय राष्ट्रीय एकतेचे सुंदर उदाहरण असल्याचे राज्यपाल म्हणाले.

झारखंड भगवान बिरसा मुंडा यांची वीरभूमी असून, त्यांचे जीवन स्वाभिमान, साहस आणि राष्ट्रप्रेमाची प्रेरणा देते. खनिज संपत्ती, नैसर्गिक सौंदर्य, जनजातीय संस्कृती आणि कष्टाळू लोक ही झारखंडची खरी ताकद आहे. कृषी, फलोत्पादन, पशुपालन, मत्स्यपालन, सेंद्रिय शेती तसेच उद्योजकता आणि स्टार्टअप क्षेत्रात या राज्याला मोठ्या संधी आहेत. तरुणांनी उद्योजकतेकडे वळून रोजगारनिर्मिती आणि आपल्या प्रदेशाच्या विकासात योगदान द्यावे, असे आवाहनही त्यांनी केले.

महाराष्ट्र ही संतांची आणि समाजसुधारकांची भूमी, उत्तराखंड ही देवभूमी, तर झारखंड ही जनजातीय गौरव आणि नैसर्गिक संपत्तीची भूमी आहे. या तिन्ही राज्यांच्या वैशिष्ट्यपूर्ण सांस्कृतिक वारशातून देशाची विविधता अधोरेखित होते. महाराष्ट्रातील नागरिकांनी उत्तराखंड आणि झारखंडला भेट देऊन तेथील नैसर्गिक सौंदर्य व सांस्कृतिक वारसा जाणून घ्यावा, तसेच या राज्यांतील नागरिकांनीही महाराष्ट्राच्या ऐतिहासिक आणि सांस्कृतिक वारशाची ओळख करून घ्यावी, असे आवाहन राज्यपालांनी केले.

यावेळी कार्यक्रमासाठी उपस्थित अभिनेत्री हिमानी शिवपुरी, बद्री केदार चॅरिटेबल ट्रस्टचे विश्वस्त केसर सिंह बिष्ट, जय फाउंडेशन व रुद्र प्रतिष्ठानचे अध्यक्ष धनंजय सिंह, राष्ट्रीय चित्रपट पुरस्कार विजेत्या ‘ढोली’ या गढवाली चित्रपटाचे निर्माते शिशिर कृष्ण शर्मा, दिग्दर्शक दिनेश भोसले, यांना राज्यपाल जिष्णु देव वर्मा यांनी सन्मानित केले.

 कार्यक्रमासाठी विविध संस्थांचे पदाधिकारी, कलाकार आणि उत्तराखंड व झारखंडमधील नागरिक उपस्थित होते.

0000

संबंधित पोस्ट

देशाच्या अन्नसुरक्षेसाठी कृषी संशोधन आणि अनुभवाधारित शिक्षणाला चालना देणे काळाची गरज – विधानसभा अध्यक्ष ॲड. राहुल नार्वेकर*प्रादेशिक कृषी संशोधन केंद्र, कर्जत येथे संशोधन प्रकल्पांची पाहणी; विद्यार्थी, शास्त्रज्ञ व शेतकऱ्यांशी साधला संवाद*

वोडाफोन आयडिया कंपनीवर 32 लाख रुपयांचा रायगड ग्राहक मंचात दावा दाखल…

लोणीत रंगणार जलसंपदा विभागाचा ‘क्रीडाकुंभ’ राज्यभरातील अधिकारी – कर्मचारी दाखवणार खेळाचे कौशल्य७ ते ९ फेब्रुवारी दरम्यान लोणी – शिर्डीत क्रीडा स्पर्धांचा थरार ; तयारी अंतिम टप्प्यात…

vishwatmaklokswamivarta

मुंबई महानगर प्रदेश विकास प्राधिकरणाने प्रकल्पबाधितांच्या पुनर्वसन प्रक्रियेसाठी तंत्रज्ञानाधारित ‘ई-पुनर्वसन’ प्रणाली कार्यान्वित पहिल्याच दिवशी गरीबनगरमधील ९४ पात्र झोपडीधारकांना ‘ई-पुनर्वसन’ प्रणालीद्वारे ताबापत्र देण्यात आली.

दक्षिण मुंबईतील बेलसिस पुलाला पुण्यश्लोक अहिल्यादेवी होळकर यांचे नाव देण्याचा निर्णय मुख्यमंत्री देवेंद्र फडणवीस

जम्मू-काश्मीर पुनर्गठन (दुरुस्ती) विधेयक २०२५ आणि केंद्रशासित प्रदेश शासन (दुरुस्ती) विधेयक २०२५ या महत्त्वपूर्ण विधेयकांवर सखोल चर्चा आणि व्यापक सल्लामसलत सुरू केल्याची माहिती समितीच्या अध्यक्षा अपराजिता सारंगी