राष्ट्रीय पल्स पोलिओ लसीकरण मोहीम दि. ३ मार्च २०२४
ठाणे, प्रतिनिधी :- ठाणे जिल्ह्यात राष्ट्रीय पल्स पोलिओ लसीकरण मोहीम रविवार, दि. ३ मार्च २०२४ रोजी ग्रामीण भागातील अंबरनाथ, कल्याण, शहापुर, भिवंडी व मुरबाड तालुक्यात तसेच बदलापूर व अंबरनाथ नगरपालिका क्षेत्रात राबवण्यात येणार आहे. या मोहिमेत जिल्ह्यातील ग्रामीण भागातील पाच तालुक्यातील ५ वर्षापर्यंतच्या एकूण १ लाख ३६ हजार ७५६ बालकांना तसेच बदलापूर व अंबरनाथ क्षेत्रातील एकूण ६८ हजार ५९५ बालकांना पोलिओची लस देण्यात येणार आहे.
जिल्हाधिकारी श्री. अशोक शिनगारे व मुख्य कार्यकारी अधिकारी डॉ. रुपाली सातपुते यांच्या मार्गदर्शनाखाली या मोहिमेत ग्रामीण व बदलापूर अंबरनाथ नगरपालिका क्षेत्रात एकूण १ हजार ८६८ बुथवर या कार्यक्रमाचे आयोजन करण्यात येत आहे. यासाठी ५ हजार ७७८ कर्मचाऱ्यांचा सहभाग असणार आहे. तसेच दि. ३ मार्च २०२४ रोजी बूथवर लसीकरण केल्यानंतर राहिलेल्या बालकांना कर्मचारी घरोघरी जाऊन पुढील ३ ते ५ दिवसात पोलिओचे लसीकरण करणार आहेत, अशी माहिती जिल्हा आरोग्य अधिकारी डॉ. गंगाधर परगे यांनी दिली.
ही मोहीम यशस्वी करण्याकरिता जिल्हाधिकारी श्री. अशोक शिनगारे व मुख्य कार्यकारी अधिकारी डॉ. रुपाली सातपुते व जिल्हा शल्यचिकित्सक, डॉ. कैलास पवार यांनी या मोहिमेदरम्यान जास्तीत जास्त लाभार्थीनी लसीकरण करुन घ्यावी, असे आवाहन केले आहे.
000000000
