सेवा संकल्प अभियानांतर्गत न्यू इंग्लिश स्कूल सातारा येथे महिला व बालविकास जनजागृती कार्यक्रम संपन्न
सातारा प्रतिनिधी :- महिला व बाल विकास अधिकारी कार्यालय सातारा अंतर्गत राज्यात १७ सप्टेंबर ते १७ ऑक्टोबर २०२६ या कालावधीत ‘सेवा संकल्प अभियान’ राबविण्यात येत आहे. या अभियानांतर्गत जिल्हा महिला सक्षमीकरण केंद्र, सखी वन स्टॉप सेंटर आणि चाईल्ड लाईन यांच्या संयुक्त विद्यमाने न्यू इंग्लिश स्कूल, सातारा येथे जनजागृती कार्यक्रमाचे आयोजन करण्यात आले होते
या कार्यक्रमात जिल्हा महिला सक्षमीकरण केंद्र, सखी वन स्टॉप सेंटर आणि चाईल्ड हेल्प लाईनच्या कामकाजाबाबत उपस्थितांना सविस्तर माहिती देण्यात आली. केंद्रामार्फत हिंसाग्रस्त व पीडित महिलांना पुरविल्या जाणाऱ्या मोफत सुविधा जसे की समुपदेशन, वैद्यकीय सेवा, पोलीस मदत, कायदेशीर सल्ला आणि तात्पुरत्या निवासाची सोय याविषयी मार्गदर्शन करण्यात आले
कार्यक्रमा दरम्यान कौटुंबिक हिंसाचारापासून महिलांचे संरक्षण अधिनियम २००५, बाल संगोपन योजना, पोक्सो कायदा, अनाथ प्रमाणपत्र आणि बालविवाह प्रतिबंधक कायदा याबाबत उपस्थितांना सविस्तर माहिती देण्यात आली. तसेच मुलींनी मानसिक व शारीरिकदृष्ट्या सक्षम होणे कसे गरजेचे आहे, यावरही उपस्थितांना मार्गदर्शन करण्यात आले.
या जनजागृती कार्यक्रमास महिला सक्षमीकरण केंद्राच्या मृण्मयी जाधव, सोनाली देसाई, वन स्टॉप सेंटरच्या किरण साळुंखे यांच्यासह शाळेचे शिक्षक आणि विद्यार्थी मोठ्या संख्येने उपस्थित होते.
0000
