जपानचे माजी पंतप्रधान दिवंगत शिंजो आबे यांच्या पत्नी आकी आबे यांनी घेतली मुख्यमंत्र्यांची सदिच्छा भेट-भारत-जपानच्या सांस्कृतिक आणि आध्यात्मिक नात्याची आकी आबे यांच्याकडून प्रशंसा

मुंबई, प्रतिनिधी: जपानचे माजी पंतप्रधान दिवंगत शिंजो आबे यांच्या पत्नी आकी आबे यांनी मुख्यमंत्री देवेंद्र फडणवीस यांची सदिच्छा भेट घेतली. यावेळी त्यांनी वाराणसी आणि काशी येथील भेटीचे अनुभव सांगताना भारताच्या प्राचीन आध्यात्मिक परंपरा आणि जपानमधील धार्मिक प्रथांमधील विलक्षण साम्य अधोरेखित केले.वाराणसी हे भारतातील सर्वात प्राचीन आणि पवित्र शहरांपैकी एक असल्याचे नमूद करत, काशीजवळील एका आध्यात्मिकदृष्ट्या महत्त्वाच्या ठिकाणी संस्कृत भाषेत म्हटली जाणारी प्रार्थना, पूजा-अर्चा आणि नैवेद्य अर्पण करण्याच्या पद्धती जपानमधील परंपरांशी मिळत्याजुळत्या असल्याचा अनुभव त्यांनी कथन केला. या साम्यामुळे भारत आणि जपान यांच्यातील सांस्कृतिक व आध्यात्मिक संबंधांची प्राचीनता आणि दृढता अधोरेखित होत असल्याचे त्यांनी सांगितले.

यावेळी आकी आबे यांच्यासमवेत शिष्टमंडळ तसेच मुख्यमंत्र्यांचे प्रधान सचिव डॉ. श्रीकर परदेशी उपस्थित होते.