दक्षता जनजागृती सप्ताहात विविध कार्यक्रमांचे आयोजन- पोलीस उप अधीक्षक यास्मीन इनामदार- दि. 27 ऑक्टोबर ते दि. 2 नोव्हेंबर 2025 कालावधीत दक्षता जनजागृती सप्ताह
सांगली, प्रतिनिधी.) : केंद्रीय दक्षता आयोगाच्या सुचनेनुसार प्रतिवर्षी देशामध्ये सर्वत्र दक्षता जनजागृती सप्ताह आयोजित केला जातो. त्यानुसार महाराष्ट्र राज्यात दि. 27 ऑक्टोबर 2025 ते दि. 2 नोव्हेंबर 2025 या कालावधीत दक्षता जनजागृती सप्ताह आयोजित करण्यात आला आहे. या सप्ताह कालावधीत ॲन्टी करप्शन ब्युरोची कार्यपध्दती नागरिकांना माहिती व्हावी, जनतेमध्ये भ्रष्टाचारविरोधी जनजागृती होण्याच्या दृष्टीने जिल्ह्यात सर्वत्र दररोज विविध कार्यक्रमांचे आयोजन करण्यात आले असल्याचे ॲन्टी करप्शन ब्युरो सांगली पोलीस उप अधीक्षक यास्मीन इनामदार यांनी प्रसिध्दीपत्रकाव्दारे कळविले आहे.
या सप्ताह कालावधीत प्रामुख्याने भ्रष्टाचार विरोधातील कारवाईसंबंधी नागरिकांना मार्गदर्शन करण्यात येणार आहे. तसेच विविध सामाजिक संघटना व गाव पातळीवर नागरिकांशी संपर्क साधून त्यांना माहिती दिली जाणार आहे. त्याचप्रमाणे विविध शासकीय कार्यालयाच्या ठिकाणी भ्रष्टाचार विरोधी घोषवाक्यांचे बॅनर्स, स्टीकर्स लावले जाणार आहेत.
भ्रष्टाचार प्रतिबंध विभागामार्फत भ्रष्टाचारी लोकसेवकांविरूद पुढीलप्रमाणे कारवाई करण्यात येते.
अपसंपदेची चौकशी – या प्रकारामध्ये नावानिशी किंवा निनावी अर्जावर देखिल चौकशी केली जाते. एखाद्या शासकीय कर्मचाऱ्याची घर, मोटारगाड्या, दुकाने, प्लॉट, शेतजमिनी इत्यादी मालमत्ता भ्रष्टाचारातून मिळवली असल्याबाबतची तक्रारीवरून चौकशी करण्यात येते. तक्रारीत अशी स्थावर मालमत्ता कोठे आहे याबाबत प्राथमिक व अधिकृत माहिती असणे जरुरीचे आहे.पडताळणी व लाचेचा सापळा – या प्रकारामध्ये तक्रारदाराने प्रत्यक्ष हजर राहून लोकसेवकाविरुद्ध लाचेच्या मागणीबाबत केलेल्या तक्रारीवरून लाचेचा सापळा आयोजित करून भ्रष्ट लोकसेवकास रंगेहाथ पकडून कारवाई केली जाते.
पदाचे दुरुपयोगाबाबतधी चौकशी – या प्रकारामध्ये लोकसेवकाने त्याच्या पदाचा दुरुपयोग करून शासकीय संपत्तीचा अपहार करणे किंवा स्वतःच्या फायद्यासाठी वापर करणे, अथवा इतरांना तसा वापर करु देणे अशा प्रकारामध्ये संबंधित लाचलुचपत विभागामार्फत चौकशी करण्यात येते. अशा प्रकारामध्ये भ्रष्टाचार आढळून आल्यास सबंधित खात्याचे प्रभारी अधिकारी लाचलुचपत प्रतिबंध खात्याकडे त्या तक्रारी पाठवितात.: राज्य सरकारचे अधिकारी, कर्मचारी, शासन अनुदानीत मंडळे/ संस्था यांचे अधिकारी/ कर्मचारी, महापालिका / नगरपालिका / जिल्हापरिषद, ग्रामपंचायत येथील अधिकारी, कर्मचारी इत्यादी लोकसेवकांची भ्रष्टाचारसंबंधी माहिती असल्यास अगर लोकसेवक लाचेची मागणी करीत असल्यास त्याबाबतची तक्रार पोलीस उपअधीक्षक ॲन्टी करप्शन ब्युरो कार्यालय, बदाम चौक, पोलीस लाईन शेजारी, सांगली टोल फ्री नंबर 1064, मोबाईल क्रमांक 9404041064, फोन क्रमांक 0233-2373095 येथे किंवा पोलीस उपआयुक्त/ पोलीस अधीक्षक अॅन्टी करप्शन ब्युरो, पुणे, सेंट्रल बिल्डींग, सी बॅरॅक फोन क्रमांक 020-26122134 वर संपर्क साधावा. तसेच मोबाईल अॅप (डाऊनलोड करण्यासाठी www.acbmaharashtra.net) चा वापर करावा, असे प्रसिध्दी पत्रकात म्हटले आहे.
00000
