डोलाया सागरी किनारा सखोल स्वच्छता मोहीमेतून जागतिक पर्यावरण दिन साजरा

        नवी मुंबई प्रतिनिधी-  जागतिक पर्यावरण दिनाची यावर्षी सन 2026 ची मध्यवर्ती संकल्पना ‘हवामानासाठी आत्ताच कृती (Now for Climate)’ जाहीर करण्यात आलेली असून त्या अनुषंगाने नवी मुंबई महानगरपालिकेने विविध उपक्रम राबविले आहेत व यामध्ये मोठ्या प्रमाणात लोकसहभागावर भर दिलेला आहे.

असाच एक सागरी किनारा स्वच्छतेचा महत्वपूर्ण उपक्रम नवी मुंबई महानगरपालिका व ॲडशिव टेक्नॉलॉजीज इंडिया प्रा.लि. यांच्या सहयोगाने पाम बिच मार्गानजिक समुद्रेश्वर मंदिराच्या बाजूच्या डोलाया सागर किना-याजवळच्या पाणथळ जागेत राबविण्यात आला.

   यामध्ये महापौर श्रीम.सुजाता पाटील यांनी सहभागी होत सागरी किना-याच्या सखोल स्वच्छतेत प्रत्यक्ष योगदान दिले. या मोहीमेत महापालिका अधिकारी, कर्मचारी व स्वच्छताकर्मींप्रमाणेच हेंकेल कंपनीचे प्रतिनिधी, इन्व्हायरमेंट लाईफ फाऊंडेशनचे स्वयंसेवक, नेक्सस मॉलचे कर्मचारी अत्यंत उत्साहाने मोठ्या संख्येने सहभागी झाले होते.

   यावेळी सहभागी 200 हून अधिक कर्मचारी, नागरिकांनी पाण्याच्या प्रवाहासोबत किना-यावर आलेला प्लास्टिक व तत्सम 110 गोणी कचरा गोळा केला. या सागरी किनारा सखोल स्वच्छता मोहीमेव्दारे ‘हवामानासाठी आत्ताच कृती’ या जागतिक पर्यावरण दिनाच्या मध्यवर्ती संकल्पनेला अनुसरून प्रत्यक्ष कृती करण्यात आली

00000