मुंबईतील माझगाव परिसरात गणेश मिरवणुकीदरम्यान अंडी फेकल्याच्या प्रकरणात दानिश शेर खानला अटक

मुंबई प्रतिनिधी-

मुंबईतील माझगाव परिसरात गणेश मिरवणुकीदरम्यान अंडी फेकल्याच्या प्रकरणात दानिश शेर खानला अटक करण्यात आली आहे.माझगावचा मोरया गणेशोत्सव मंडळाची गणेशमूर्ती मिरवणूक परिसरातून जात असताना हा प्रकार घडला. मिरवणुकीदरम्यान गणेशमूर्तीवर अंडे पडल्याने भाविकांमध्ये संतापाचे वातावरण निर्माण झाले आणि पोलिसांनी तातडीने कारवाई सुरू केली.

पोलिसांच्या माहितीनुसार, दानिश शेर खान हा ऑनलाइन अंडी डिलिव्हरीसाठी इमारतीत गेला होता. त्याचवेळी मिरवणुकीत फटाके फोडल्याने निर्माण झालेल्या धुरामुळे त्याच्या डोळ्यांना त्रास झाला. त्यानंतर संतापाच्या भरात त्याने इमारतीच्या वरच्या मजल्यावरून मिरवणुकीच्या दिशेने अंडी फेकली.

या घटनेनंतर आरोपीचा शोध घेण्यासाठी पोलिसांनी पाच विशेष पथके तयार केली होती. तांत्रिक पुराव्यांच्या आधारे आरोपीची ओळख पटवण्यात आली आणि घटनेनंतर सुमारे 36 तासांनी दानिश शेर खानला अटक करण्यात आली.या प्रकरणी भारतीय न्याय संहितेच्या (BNS) संबंधित कलमांनुसार गुन्हा दाखल करण्यात आला असून, पुढील तपास सुरू आहे.