‘वसुंधरा पायी दिंडी २०२६’चा पर्यावरण संवर्धनाचा संदेश ठाण्यात ५ ऑक्टोबरला आगमन

ठाणे – प्रतिनिधी –

जगद्गुरु श्रीमद् रामानंदाचार्य नरेंद्राचार्य जी यांच्या प्रेरणेने पर्यावरण संवर्धन, स्वच्छता, वृक्षारोपण, सामाजिक बांधिलकी आणि जनजागृतीचा संदेश घेऊन ‘वसुंधरा पायी दिंडी २०२६’ या उपक्रमाचे आयोजन करण्यात आले आहे. मुंबई (वसई) ते श्रीक्षेत्र नाणीजधाम असा शेकडो किलोमीटरचा पायी प्रवास करणारी ही दिंडी ४ ऑक्टोबर रोजी उपपीठ मुंबई, विरार–शिरसाड येथून प्रस्थान करणार असून, ५ ऑक्टोबर रोजी ठाणे शहरातून मार्गस्थ होणार आहे.

महाराष्ट्रातील विविध उपपीठांसह मुंबई परिसरातून हजारो भाविक या दिंडीत सहभागी होणार आहेत. दिंडीच्या माध्यमातून पर्यावरणाचे रक्षण, स्वच्छता, वृक्षारोपण तसेच समाजाप्रती असलेली जबाबदारी याबाबत नागरिकांमध्ये जनजागृती करण्यात येणार आहे.

ठाणे परिसरातील प्रवासादरम्यान दिंडीच्या माध्यमातून विविध सामाजिक व पर्यावरणपूरक उपक्रम राबविण्यात येणार आहेत. ५ ऑक्टोबर रोजी दुपारी १२.३० वाजता घोडबंदर रोड येथील क्रियान बँक्वेट हॉल येथे दिंडीचा दुपारचा थांबा, तर रात्री ७.३० वाजता विटावा येथील पऱ्याचे मैदान, श्री कृष्ण मंदिर येथे रात्रीचा मुक्काम असणार आहे.

पर्यावरण संवर्धनाचा संदेश जनमानसापर्यंत पोहोचविणाऱ्या या अनोख्या उपक्रमात सहभागी व्हावे, असे आवाहन जगद्गुरु नरेंद्राचार्य महाराज संस्थान, उपपीठ मुंबई यांच्या वतीने करण्यात आले आहे.

0000