मुख्यमंत्री एकनाथ शिंदे सरकारने विश्वासदर्शक ठराव जिंकला; सत्ताधारी गटाला 164 तर, महाविकासआघाडीला केवळ 99 मते..

 

मुंबई प्रतिनिधी

मुख्यमंत्री एकनाथ शिंदे (Eknath Shinde) यांच्या नेतृत्वाखाली सत्तेत आलेल्या नवनिर्वाचीत सरकारने विश्वासमत ठराव जिंकला आहे. दोन दिवसांच्या अधिवेशनात पहिल्या दिवशी अध्यक्षांची निवड झाली. त्यानंतर दुसऱ्या दिवशी एकनाथ शिंदे सरकारकडून विश्वासदर्शक ठराव (Floor Test) मांडण्यात आला. सुरुवातीला हा ठराव आवाजी मतदानाने पारीत करण्यात आला. त्यानंतर मतदानाची मागणी करण्यात आली. एकनाथ शिंदे सरकारने हा ठराव 164 मतांनी जिंकला. विशेष म्हणजे विधानसभा अध्यक्ष पदाच्या निवडणुकीत शिवसेनेच्या बाजूने मतदान करणाऱ्या आमदार संतोष बांगर यांनी विश्वासदर्शक ठरावात सरकारच्या बाजूने मतदान केले.

विश्वावासदर्शक ठरावात सरकारविरोधात विरोधी पक्षांना 99 मते मिळाली. राज्यात पाठीमागील दोन आठवड्यांपासून प्रदीर्घ काळ सुरु असलेली राजकीय उलथापालथ आजच्या विश्वासदर्शक ठरावाने काहीशी संपली.

विश्वासदर्शक ठरावाला सामोरे जाण्यापूर्वी मुंबईतील एका हॉटेलमध्ये भाजप आणि एकनाथ शिंदे समर्थक शिवसेना आमदारांची एक संयुक्त बैठक झाली. या बैठकीवेळी एकनाथ शिंदे यांनी दावा केला होता की, आपल्याला शिवसेनेतील 40 आमदारांचा पाठिंबा आहे.

त्यामुळे आपले सरकार विश्वासदर्शक ठराव 166 मतांनी जिंकेल असा दावा केला होता. प्रत्यक्षात सभागृहात मात्र एकनाथ शिंदे यांना 164 मते मिळाली.