लोकसभा निवडणुकीचं रणशिंग वाजायला सुरूवात झालीय.. सत्ताधारी एनडीए विरुद्ध विरोधकांची ‘इंडिया’ आघाडी अशी समोरासमोर टक्कर…
[ बेंगलोर प्रतिनिधी:
लोकसभा निवडणुकीचं रणशिंग वाजायला सुरूवात झालीय.. सत्ताधारी एनडीए विरुद्ध विरोधकांची ‘इंडिया’ आघाडी अशी समोरासमोर टक्कर होणाराय. भाजपला सत्तेवरून हटवण्याची रणनीती आखण्यासाठी बंगळुरूमध्ये गेल्या दोन दिवसांपासून विरोधकांच्या जोरबैठका सुरू आहेत. काँग्रेसप्रणित यूपीएचं नामोनिशाण मिटलंय. त्यामुळं आता इंडिया अर्थात च्या झेंड्याखाली विरोधकांची वज्रमूठ भक्कम होतेय.
बंगळुरुमध्ये 17-18 तारखेला विरोधकांची बैठक पार पडली. बैठकीच्या पहिल्या दिवशी अनौपचारिक चर्चा झाली. तर बैठकीच्या दुसऱ्या दिवशी महागठबंधनाच्या नावावर चर्चा झाली. बैठकीला उपस्थित असणाऱ्या सर्व पक्षांच्या नेत्यांना आघाडीसाठी नाव सुचवण्यास सांगण्यात आलं होतं. अखेर दुसऱ्या दिवसाच्या बैठकीत INDIA नावावर शिक्कामोर्तब करण्यात आलं. या बैठकीला 26 पक्ष उपस्थित होते.
विरोधकांची वज्रमूठ… INDIA
काँग्रेससह तृणमूल काँग्रेस, जेडीयू, आरजेडी, राष्ट्रवादी काँग्रेस, सीपीएम, सीपीआय, समाजवादी पार्टी, डीएमके, जेएमएम, आम आदमी पार्टी, शिवसेना उद्धव गट, नॅशनल कॉन्फरन्स, पीडीपी, आरएलडी, आईयूएमएल, केरळ काँग्रेस (एम), एमजीएमके, वीसीके, आरएसपी, केरळ काँग्रेस (जोसेफ), केएमडीके, अपना दल कमेरावादी, एमएमके, सीपीआईएमएल आणि एआईएफबी अशा 26 पक्षांचे नेते उपस्थित होते.
विशेष म्हणजे काँग्रेसनं पंतप्रधानपदावरची दावेदारी सोडलीय. पंतप्रधानपद किंवा सत्तेसाठी ही आघाडी नसल्याचं काँग्रेस अध्यक्ष मल्लिकार्जुन खरगेंनी स्पष्ट केलंय. तर आधी भाजपला सत्तेवरून दूर करूया, त्यानंतर पंतप्रधानपदाचा उमेदवार ठरवू, असं मत नीतीश कुमारांनी व्यक्त केलंय.
पंतप्रधानपदावर दावा नाही – काँग्रेस
काँग्रेस अध्यक्ष मल्लिकार्जुन खर्गे यांनी पंतप्रधानात काँग्रेसला रस नसल्याचं म्हटलं आहे. या बैठकीत आमचं उद्दीष्ठ सत्ता मिळवणं हे नाहीए, संविधान, लोकतंत्र, धर्मनिरपेक्षता आणि सामाजिक न्यायाचं रक्षण करण्यासाठी ही लढाई असल्याचं मल्लिकार्जु खर्गे यांनी म्हटलंय.
अवघ्या वर्षभरावर लोकसभा निवडणुका येऊन ठेपल्यात. त्यादृष्टीनं एनडीए विरुद्ध इंडिया अशा दोन्ही बाजूनं रणशिंग फुंकण्यात आलंय. आता प्रत्यक्ष रणमैदानात कोण कुणाच्या बाजूनं लढणार आणि घोडामैदान कोण मारणार, याची उत्सूकता देशातल्या जनतेला आहे…
