लक्षवेधी महारक्तदान शिबिराने जालन्यात शिवरायांना अभिवादन आयोजक सामाजिक कार्यकर्ता शेख इब्राहिम ठरला खरा मावळा..
राज्य प्रतिनिधी जालना- सामाजिक कार्यकर्ते शेख इब्राहिम यांनी शिवजयंतीनिमित्ताने सोमवारी लक्षवेधी महा रक्तदान शिबिराचे आयोजन करून शेकडो रक्तदात्यांनी रक्तदान करून शिवरायांच्या चरणी मानाचा मुजरा अर्पित केला.
शेख इब्राहिम हे गेल्या 15 वर्षापासून शिवजयंती व डॉ. बाबासाहेब आंबेडकर यांच्या जयंतीनिमित्त जालना शहरातील अंबड रोडवरील मंमादेवी नगर परिसरात महा रक्तदान शिबिराचे आयोजन करून सामाजिक उपक्रम राबवीत आहेत. मराठा क्रांती मोर्चा प्रणित छत्रपती शिवाजी महाराज जयंती उत्सव समिती व शेख इब्राहिम मित्र मंडळाच्या वतीने सोमवारी महा रक्तदान शिबिराचे आयोजन करण्यात आले.
प्रारंभी शिवरायांच्या अर्धकृती पुतळ्यास पुप्षमाला अर्पण करून मान्यवरांनी अभिवादन केले. या महा रक्तदान शिबिरात सर्व जाती- धर्माच्या तरूणांनी रक्तदान केले. शेख इब्राहिम यांनी महा रक्तदान शिबिराचे आयोजन केल्याबद्दल मराठा सेवा संघाचे आर. आर. खडके, भास्कर अंबेकर, जालना शहर जिल्हा काँग्रेसचे अध्यक्ष शेख महेमूद,मराठा क्रांती मोर्चाचे राज्य समन्वयक डॉ. संजय लाखे पाटील, अक्षय गोरंट्याल आदींनी अभिनंदन करून कौतुक केले. नूर हाॅस्पिटलच्या रक्तपेढीतील डॉ. राहिला शेख, डॉ. बुशरा,खुशमिदा शेख, करामखान,अलिम शेख आदींनी या रक्तदान शिबिरासाठी सहकार्य केले. शेख महेमूद यांच्या हस्ते रक्तदात्यांना प्रमाणपत्राचे वितरण करण्यात आले.
यावेळी बोलतांना शेख इब्राहिम म्हणाले की, छत्रपती शिवाजी महाराज यांनी रयतेचे राज्य स्थापन करून सर्व समाज घटकांना सोबत घेऊन राज्य केले होते. विशेष करून त्यांच्या सैन्य दलात मुस्लिम मावळ्यांना जबाबदारीची पदे देउन त्यांच्यावर मोठा विश्वास दाखविला होता. हा महाराजांचा गौरवशाली इतिहास आहे. आज खऱ्या अर्थाने शिवरायांच्या विचारांची देशाला गरज आहे.
हे महा रक्तदान शिबिर यशस्वी करण्यासाठी मराठा क्रांती मोर्चा प्रणित छत्रपती शिवाजी महाराज जयंती उत्सव समितीचे अध्यक्ष अशोक पडूळ,मराठा महासंघाचे जिल्हाध्यक्ष अरविंद देशमुख, मार्गदर्शक जगन्नाथ काकडे, किरण शिरसाट, संतोष कऱ्हाळे, राजे जाधव, संतोष गाजरे, आसिफ पठाण, अर्शद शेख, दत्ता लहाने, मुन्ना पठाण आदींनी परिश्रम घेतले.
