पीक कर्ज वितरण, बियाणे खते उपलब्धतेचा जिल्हाधिकाऱ्यांनी घेतला आढावा
छत्रपती संभाजीनगर, प्रतिनिधी-
खरीप हंगामाच्या नियोजनासाठी शेतकऱ्यांना वेळेत पीक कर्ज उपलब्ध व्हावे तसेच त्यांना बियाणे व खते योग्य वेळी उपलब्ध असावे यासाठी कर्ज वितरण व बियाणे उपलब्धतेबाबत जिल्हाधिकारी दिलीप स्वामी यांनी आज आढावा घेतला.
जिल्हा नियोजन सभागृहात बैठकीचे आयोजन करण्यात आले होते. जिल्हा अधिक्षक कृषी अधिकारी प्रकाश देशमुख, जिल्हा कृषी विकास अधिकारी प्रकाश पाटील, निवासी उपजिल्हाधिकारी विनोद खिरोळकर, जिल्हा अग्रणी बॅंकेचे व्यवस्थापक मंगेश केदार, जिल्हा उपनिबंधक सहकारी संस्था मुकेश बारहाते तसेच बियाणे वितरक, उत्पादक संस्था, रेल्वे, सर्व बॅंकांचे अधिकारी आदी उपस्थित होते.
जिल्ह्यात यंदाच्या खरीप हंगामात ३९ हजार २६४ क्विंटल बियाण्याची आवश्यकता असून पिकनिहाय त्याची मागणी व उपलब्धता नोंदविण्यात आली आहे. खरीप हंगामात सर्व प्रकारचे बियाणे उपलब्ध असल्याचे सांगितले. हे बियाणे आता वितरक ते विक्रेते यास्तरावर वितरण सुरु असून लवकरच बियाणे शेतकऱ्यांना नजिकच्या बियाणे विक्रेत्याकडे उपलब्ध होईल. तसेच खतांची मागणी ३ लाख २० हजार २६३ मे.टन इतकी मागणी असून २ लाख ८८ हजार ७०० मे.टन इतके आवंटन उपलब्ध आहे. तर १ लाख ५० हजार मे.टन इतका शिल्लक साठा आहे. त्यामुळे खताची उपलब्धता असल्याची माहिती देण्यात आली. जिल्ह्यात शेतकऱ्यांनी पीक कर्ज उपलब्धतेसाठी कर्ज नुतनीकरण करुन घ्यावे, असे आवाहन करण्याचे निर्देश जिल्हाधिकारी स्वामी यांनी दिले. पीक कर्ज देतांना बॅंकांनी संवेदनशीलतेने प्रकरणे हाताळावीत अशी सुचनाही त्यांनी केली. जिल्हाधिकारी स्वामी म्हणाले की, शेतकऱ्यांना पीक कर्ज, बियाणे व खते हे वेळेवर उपलब्ध करुन द्यावे, जेणे करुन खरीप हंगामाचे नियोजन व्यवस्थित करता येईल.
