🚩 !!श्री वडवाळसिध्दनागेश!! 🚩     श्री नागनाथ देवस्थान पंचकमिटी    श्रीक्षेत्र वडवाळ    卐श्री तीर्थक्षेत्र वडवाळ卐  ॐ॥श्री नागनाथ दर्शन॥ॐ

आध्यात्मिक वार्ता

 

           आषाढ ◆ शुक्लपक्ष   तिथी ◆ अष्टमी     वार रविवार दिनांक १४ जुलै २०२4⊰● अभंग लहरी – भावार्थासह ●⊱

देवा, तुझ्या नामाची मज बहु पिती, जेणे विश्वजन उध्दरती । म्हणवुनी धरली गा साधु संगती, हरीची निज नाम भक्ती । मज देगा देवा ।।१।। ज्या नामें ध्रुव प्रल्हाद सोडविला, कीं अंबऋषी । ज्या नामें गती अजामेळा कीं, आणिक उध्दरीले गणिकेसी ।। ज्या नामें द्रौपदीची कीं लज्जा, रक्षियेली सभेसी । नामें तारिल्या कीं शिळा, जळी बुडता गजेंद्रासी ।।२।। नामें तारिले बा पांडव, नामें तारीले व्यासादिक शुक देव । नामें गति या जीवा महानुभवा, हरीचे नामें निज जिव्हा तू दृढ धरी ।।३।। धरी रे नंदनंदना जगज्जीवना, प्रेमळ गहना आधिष्ठाना । व्यापक त्रिभुवना, देवाजी व्यापक त्रिभुवना ।।४।। हरी तू सुख साधना, पतीत पावना भक्त जना । आरिमर्दना, मुखी धरुनी स्तना, आजी शोषयली पूतना देवा तू शोषयली पूतना ।।५।। बाग रहाटना, काळा त्रहाटना, गो रक्षणा गोवर्धना । रुक्मिणी जीवना, पुरवीसी मनोकामना, देवाजी पुरवीसी मनोकामना ।।६।। हरी, तू स्वानंद जीवना, ऋषी मुनी जना । अभयदाना, चंद्रवदना, कमलनयना हरीचा आधार, चौदा भुवना, देवाचा आधार चौदा भुवना ।।७।। हरी, तू वेद प्रमाणा, सहा शास्त्रे अठरा पुराणा । विवाद जाणा, सकल साधना, गुरु मुखे केली खंडना आजी गुरु मुखे केली खंडना, आजी गुरु मुखे केली खंडना । देवाजी गुरु मुखे केली खंडना ।।८।। हरी, तू सुबुध्द सुजाणा, विषय कल्पना दवडुनी, मना लावी चरणा । विश्व वंदना, निज ध्याना, निज गुरु निधाना, देवाजी निज गुरु निधाना ।।९।।

 

क्रमशः

 

भावार्थ :- देवा ! तुझ्या नामाने साऱ्या जगाचा उध्दार होतो. असे तुझे ते नाम आहे, ते घेणे मला फार आवडते, आणि या साठीं मी साधुंची संगत धरली आहे. ईश्वरा ह्या तुझ्या निज नामाची भक्ती मला सतत लाभू दे, हेच माझे मागणें तुझ्या चरणासी आहे. ।।१।। देवा, तुझे गोड नाम असें आहे, कीं तुझे नाव घेणाऱ्या ध्रुवाला व प्रल्हादाला जाचापासून सोडविलेस. अंबऋषी, अजामेळ व गणिका यांचा उध्दार झाला. भर सभेमध्ये तुझ्या नामामुळे द्रौपदीची लज्जा रक्षण झाली, तुझ्या नामाने पाण्यात दगडाच्या शिला तरल्या. जलामध्ये गजेंद्र बुडत असतांना तो वाचला. ।।२।। देवा, तू नामानें पांडवांना तारलेस, व्यासमुनी, शुकदेव यांचा ही नामाने उध्दार झाला, नामाने ह्या जीवाला सद्गती मिळते, म्हणून हे जिभे तू हरीचे नाम नित्य व दृढ धर, आणि ईश्वराचे नाम घे ! ।।३।। या साठीं हे प्राण्या तू नंदाच्या नंदनाची, जगज्जीवनाच्या नामाची प्रेमळतेने आपल्या हृदयात स्थापना कर, कारण हा देवांचा देव त्रिभुवनात व्यापलेला आहे. ।।४।। हे पतीत पावना भक्तांना सुख साधना देणाऱ्या हरी श्रीकृष्णा आरिमर्दना तू पूतना राक्षसीच्या विषाच्या स्तनाला शोषून घेऊन तिचा उध्दार करणाऱ्या देवा. ।।५।। बागेला पाणी सोडणाऱ्या, काळाला हटविणाऱ्या, गो रक्षका, गोवर्धन धारी कृष्णा, रुक्मिणीची मनोकामना पूर्ण करणाऱ्या देवा. ।।६।। हरी ! तू ऋषी मुनीजनांचा स्वानंद जीवन आहेस. तुझे अभय दान त्यांना अभय रुपाने आहे. हे चंद्र वदना, कमल नयना, तुझा देवा चौदा भुवनांना आधार आहे. ।।७।। हरी ! तू वेदांच्या प्रमाणें, सहा शास्त्रे अठरा पुराणें यांनी तुझे वर्णन व स्तुती केली आहे. त्यात विवाद झाला असतां गुरु मुखातून मी त्याचे खंडण केले आहे, देवाजी गुरु मुखे केली खंडणा. ।।८।। हरी ! तू सुबुध्द व सुजाण आहेस, विषय कल्पना बाजूला सारुन, माझ्या मनालातुझ्या चरणी लाव, हे विश्व वंद्या तुझे ध्यान मला सतत राहो. व माझ्या गुरुंचा ज्ञान ठेवा मला मिळो, अशी मी आपली कामना करीत आहे. ।।९।।

 

क्रमशः

 

🙏🙏🙏🙏🙏🙏🙏

 

●┈┉┅━❀꧁꧂❀━┅┉┈●