जम्मू काश्मीर सीमेवरील जिल्ह्यांमध्ये हाय अलर्ट जाहीर…
राज्य प्रतिनिधी
भारतीय सशस्त्र दलांनी राबवलेल्या ‘ऑपरेशन सिंदूर’ नंतर, सीमेवरील सतर्कता वाढवण्यात आली आहे. पहलगाम दहशतवादी हल्ल्याला प्रत्युत्तर देण्यासाठी कालच्या कारवाईनंतर, पाकिस्तानकडून सीमेवर जोरदार गोळीबार झाला ज्यामध्ये अनेक लोक मृत्युमुखी पडले. सीमेपलीकडून होणाऱ्या गोळीबाराच्या पार्श्वभूमीवर जम्मू आणि काश्मीरच्या सीमेवरील जिल्ह्यांमध्ये हाय अलर्ट जाहीर करण्यात आला आहे. शाळा आणि महाविद्यालये देखील बंद करण्यात आली आहेत. सीमेलगतची गावे रिकामी केली जात आहेत.
जम्मू-काश्मीरमधील सांबा आणि कठुआ जिल्ह्यांव्यतिरिक्त, जम्मू जिल्ह्यातील आरएस पुरा भागात पुढील ७२ तासांसाठी अलर्ट जारी करण्यात आला आहे. या अलर्ट अंतर्गत, सीमावर्ती भागात राहणाऱ्या लोकांना लवकरात लवकर गावे रिकामी करण्यास सांगण्यात आले आहे. बुधवारी रात्री उशिरापर्यंत सीमावर्ती भागातील गावे रिकामी करण्याचे काम सुरूच होते. खबरदारीचा उपाय म्हणून, येथील शाळा, महाविद्यालये आणि सर्व प्रकारच्या संस्था बंद ठेवण्यात आल्या आहेत.
दरम्यान, केंद्रशासित प्रदेशातील काश्मीर खोऱ्यातही सतर्कतेचा इशारा देण्यात आला आहे. सध्याची परिस्थिती पाहता, खोऱ्यातील सर्व जिल्ह्यांमध्ये नियंत्रण कक्षांचे क्रमांक जारी करण्यात आले आहेत. कोणत्याही प्रकारच्या अडचणीच्या वेळी लोकांना मदत करण्यासाठी हे क्रमांक देण्यात आले आहेत. केवळ जम्मू आणि काश्मीरच नाही तर पंजाबच्या सीमावर्ती जिल्ह्यांतील गावांनाही सतर्कतेचा इशारा देण्यात आला आहे. फिरोजपूर जिल्ह्यातील काही सीमावर्ती गावांमधील लोकांनी सुरक्षित ठिकाणी आश्रय घेण्यास सुरुवात केली आहे. तथापि, पाकिस्तानला लागून असलेल्या आंतरराष्ट्रीय सीमेवर असलेल्या अमृतसर आणि तरनतारन या गावांमध्ये परिस्थिती शांत असल्याचे सांगण्यात आले.
