थेट कर्ज योजनेच्या लाभासाठी 15 जानेवारीपर्यंत अर्ज करण्याचे आवाहन*
सातारा प्रतिनिधी: साहित्यरत्न लोकशाहीर अण्णा भाऊ साठे विकास महामंडळामार्फत मांग, मातंग, मिनी-मादीग, मादींग, दानखणी मांग, मांग महाशी, मदारी, राधेमांग, मांग गारुडी, मांग गोराडी, मादगी व मादिगा या जातीतील गरजू घटकांचा आर्थिक उन्नतीसाठी, तसेच त्यांना स्वंयरोजगाराच्या अधिअधिक संधी उपलब्ध करुन देण्याच्या उद्देशाने, रक्कम रु. एक लाख पर्यंतच्या रक्कमेची थेट कर्ज योजना राबविण्याबाबत शासनाने मान्यता दिलेली आहे. तरी इच्छुकांनी या योजनेचा लाभ घ्यावा, असे आवाहन साहित्यरत्न लोकशाहीर अण्णा भाऊ साठे विकास महामंडळाचे जिल्हा व्यवस्थापक रुपेश दळवी यांनी केले आहे.
थेट कर्ज योजनेची प्रकल्प मर्यादा रक्कम रु. एक लाख लाख करण्यात आली असून यामध्ये महामंडळाचा हिस्सा रु.८५००० (८५%), अनुदान रक्कम रु.१०००० (१०%), अर्जदाराचा सहभाग रु.५००० (५%) असे एकूण १००००० (१००%), ३ वर्ष (३६ महिने) या कालावधीसाठी द.सा.द.शे.४% व्याज दराप्रमाणे कर्ज रक्कम वितरीत करण्यात येणार आहे. या योजनेंतर्गत इच्छूक लाभार्थ्यांना रक्कम रु.१ लाख पर्यंतचे प्रकल्प मर्यादेपर्यंत असलेले लघु उद्योग करता येतील.
तरी गरजु व होतकरु इच्छुकांनी अधिक माहितीसाठी व अर्ज सादर करण्यासाठी साहित्यरत्न लोकशाहीर अण्णा भाऊ साठे विकास महामंडळाचे जिल्हा कार्यालय, भारतरत्न डॉ. बाबासाहेब आंबेडकर सामाजिक न्याय भवन, जुना एम.आय.डी.सी. रोड बॉम्बे रेस्टॉरंट जवळ, सातारा येथे मुळ जातीचा दाखला, आधारकार्ड व इतर कागदपत्रांसह स्वतः उपस्थित रहावे. जिल्हा कार्यालय सातारा मार्फत थेट कर्ज योजनेमध्ये कर्ज मागणी अर्ज कागदपत्रांच्या पुर्ततेसह दिनांक १५ जानेवारी २०२६ रोजी पर्यंत अर्ज स्वीकारण्याची कार्यवाही करण्यात येणार आहे.
000
