जम्मू कश्मीरच्या भद्रवाह – चंबा मार्गावर खोल दरीत वाहन कोसळून झालेल्या अपघातात १० जवानांचा मृत्यू..

राज्य प्रतिनिधी

जम्मू काश्मीरच्या डोडामध्ये एक मोठी दुर्घटना- लष्कराचे एक वाहन 200 फूट खोल दरीत कोसळले. या अपघातात तब्बल 10 जवान शहीद झाले आहेत. लष्कराच्या अधिकाऱ्यांनी सांगितले की, वाहनामध्ये 21 जवान होते. त्यापैकी 11 जवान जखमी झाले आहेत. जखमी जवानांना उधमपूर येथील मिलिटरी हॉस्पिटलमध्ये एअरलिफ्ट करण्यात आले आहे. अधिकाऱ्यांच्या माहितीनुसार, हा अपघात भद्रवाह-चंबा आंतरराज्यीय रस्त्यावरील खन्नी टॉप येथे झाला. सर्व जवान एका वरच्या भागात असलेल्या चौकीकडे जात असताना चालकाचे गाडीवरील नियंत्रण सुटले.

उपराज्यपाल मनोज सिन्हा यांनी या घटनेवर दु:ख व्यक्त केले आहे. डोडामध्ये झालेल्या दुर्घटनेत आपण आपल्या देशाचे 10 जवान गमावले आहेत, या घटनेमुळे खूप दु:ख झाले. आम्ही सैन्यांच्या या सर्वोच्च बलिदानाला कायम लक्षात ठेवू, अशा या संकट काळात संपूर्ण देश शहीद जवानांच्या कुटुंबाच्या पाठीशी उभा आहे. या दुर्घटनेत 10 जवान शहीद झाले आहेत, तर दहा जाण गंभीर जखमी झाले आहेत, जखमी जवानांना एअरलिफ्ट करून तातडीने उपचारासाठी रुग्णालयात दाखल करण्यात आले आहे. डॉक्टरांना उपचारासंदर्भात योग्य त्या सूचना देण्यात आल्या आहेत. हे जवान लवकरात लवकर बरे व्हावेत अशी प्रार्थना करतो, असे मनोज सिन्हा यांनी म्हटले.