राज्याचे उपमुख्यमंत्री अजित पवार यांच्या निधनामुळे रिक्त झालेल्या बारामती विधानसभा पोट निवडणुकीसाठी उपमुख्यमंत्री सुनेत्रा पवार आज उमेदवारी अर्ज दाखल करणार- अर्ज भरण्याचा शेवटचा दिवस
राज्य प्रतिनिधी-
बारामती आणि राहुरी विधानसभा पोटनिवडणुकीसाठी उमेदवारी अर्ज भरण्याचा आज शेवटचा दिवस आहे. उपमुख्यमंत्री अजित पवार यांच्या निधनामुळे रिक्त झालेल्या बारामती विधानसभा पोट निवडणुकीसाठी उपमुख्यमंत्री सुनेत्रा पवार आज उमेदवारी अर्ज दाखल करणार आहेत. दिवंगत उपमुख्यमंत्री अजित पवार यांना आदरांजली म्हणून ही निवडणूक बिनविरोध करावी असं आवाहन महायुतीकडून करण्यात आलं आहे.
काँग्रेसनं ही निवडणूक लढवण्यावर ठाम राहात आकाश मोरे यांना उमेदवारी जाहीर केली. शिवसेना उबाठा पक्षानं मात्र अद्याप आपली भूमिका जाहीर केलेली नाही. अजितदादा पवार यांना श्रद्धांजली म्हणून राष्ट्रवादी काँग्रेस शरद पवार पक्ष बारामती विधानसभेची निवडणूक लढवणार नाही, असं पक्षाचे प्रदेशाध्यक्ष शशिकांत शिंदे यांनी सांगितलं. त्यांनी काल मुंबईत पक्षाचे अध्यक्ष शरद पवार यांच्या भेटीनंतर वार्ताहरांशी संवाद साधला.
राहुरी पोटनिवडणुकीबाबत शिवसेना उबाठा आणि महाविकास आघाडी सोबत चर्चा करून निर्णय घेणार असल्याचंही शिंदे यांनी सांगितलं.
