माथेरान-नेरळ घाट रस्त्यावर जड-अवजड वाहनांना बंदी सोमवार ते गुरुवारच रस्ता दुरुस्तीची कामे; जीवनावश्यक सेवांना सूट
रायगड-अलिबाग, प्रतिनिधी : माथेरान-नेरळ-कळंब रस्ता (एसएच-१०९) किमी ०+०० ते किमी २०+४०० पर्यंतच्या रस्ता सुधारणा कामासाठी तात्पुरती वाहतूक वळविणे शक्य नसल्याने जिल्हाधिकारी तथा जिल्हादंडाधिकारी किशन जावळे यांनी सदर मार्गावर जड-अवजड वाहनांच्या वाहतुकीवर बंदी घालण्याचे आदेश जारी केले आहेत.
महाराष्ट्र राज्य पायाभूत विकास महामंडळामार्फत (MSIDC) माथेरान-नेरळ-कळंब रस्त्याच्या सुधारणेची कामे हाती घेण्यात आली आहेत. प्रकल्पांतर्गत माथेरान ते नेरळ दरम्यानचा घाटमाथ्यावरील रस्ता अरुंद, तीव्र उताराचा व धोकादायक वळणांचा असल्याने बांधकामाच्या कालावधीत वाहतूक सुरळीत ठेवणे कठीण होणार असल्याचे प्रशासनाच्या निदर्शनास आले होते.
पोलीस प्रशासनानेही माथेरान हे प्रमुख पर्यटनस्थळ असल्याने शनिवार, रविवार तसेच सलग सुट्ट्यांच्या दिवशी मोठ्या प्रमाणात पर्यटक येथे येत असल्याचे नमूद केले आहे. माथेरानमध्ये प्रवेशासाठी नेरळ-माथेरान घाट रस्ता हा एकमेव मार्ग असून, दस्तुरी नाका येथील पार्किंग क्षमता मर्यादित असल्यामुळे अनेक वाहनचालकांना घाट रस्त्यावरच वाहने उभी करावी लागतात. त्यामुळे वाहतूक कोंडी व अपघाताचा धोका वाढत असल्याचे अभिप्रायात स्पष्ट करण्यात आले आहे.
या पार्श्वभूमीवर जिल्हाधिकाऱ्यांनी रस्ता दुरुस्तीची कामे शनिवार, रविवार तसेच सलग सुट्ट्यांच्या दिवशी न करता केवळ सोमवार ते गुरुवार या चार दिवसांत करण्याचे आदेश दिले आहेत. तसेच काम सुरू असताना सदर मार्गावर सर्व प्रकारच्या जड-अवजड वाहनांच्या वाहतुकीस बंदी घालण्यात आली आहे.
दरम्यान, दूध, पेट्रोल, डिझेल, स्वयंपाकाचा गॅस, औषधे, ऑक्सिजन, भाजीपाला, पाणी आदी जीवनावश्यक वस्तू वाहून नेणाऱ्या वाहनांना या बंदीतून सूट देण्यात आली आहे.
00000
