कुटुंबाचा सामाजिक उपभोग : आरोग्य या विषयावर देशव्यापी पाहणी,सर्वेक्षणासाठी येणाऱ्या कर्मचाऱ्यांना माहिती देवून सहकार्य करण्याचे आवाहन

            जालना, प्रतिनिधी:- सांख्यिकी आणि कार्यक्रम कार्यान्वयन मंत्रालयाकडून राष्ट्रीय नमुना पाहणी 80 वी फेरी कुटुंबाचा सामाजिक उपभोग : आरोग्य या विषयावर देशव्यापी पाहणी घेण्यात येत आहे. ही पाहणी जानेवारी ते डिसेंबर 2025 या कालावधीत घेण्यात येत आहे. केंद्र शासनाच्या धर्तीवर राज्यासाठी अर्थ व सांख्यिकी संचालनालय सहभागी होत आहे. तरी या सर्वेक्षणासाठी येणाऱ्या कर्मचाऱ्यांना आपली योग्य ती परिपुर्ण माहितीसह वेळ देवून सहकार्य करावे, असे आवाहन उपसंचालक, जिल्हा सांख्यिकी कार्यालय, जालना यांनी प्रसिध्दीपत्रकाद्वारे केले आहे.

 सर्वेक्षणाचा मुख्य उद्देश आरोग्य क्षेत्राविषयी मुलभुत सांख्यिकी माहिती निर्माण करणे, शासनाकडून पुरविण्यात येणाऱ्या आरोग्य सेवांचे मोजमाप करणे, सरकारी रुग्णालयाचा वापर किती प्रमाणात होतो, सरकारी व खाजगी क्षेत्रातून मिळणाऱ्या उपचारांवर होणारा खर्च, लसीकरण तसेच 15 ते 49 वयोगटातील गर्भवती महिलांसाठी गर्भावस्थेच्या पूर्व आणि पश्चात घेतलेल्या उपचारांबाबत तपशिलवार माहिती या सर्वेक्षणाच्या माध्यमातून संकलित केली जाणार आहे. या पाहणीची माहिती शाश्वत विकास ध्येय अंतर्गत महत्वाचे निर्देशक तयार करण्यासाठी आणि पाहणीचे निष्कर्ष केंद्र व राज्य शासनाला नियोजन व ध्येय धोरणे राबविण्यासाठी उपयुक्त ठरणार आहे. प्रशिक्षीत कर्मचारी शास्त्रोक्त पध्दतीने निवडलेल्या गावांना आणि शहरी भागांना भेट देतील. पाहणी दरम्यान कुटुंबाची संकलित केलेली वैयक्तिक माहिती पुर्णपणे गोपनीय ठेवली जाईल. असेही प्रसिध्दीपत्रकाद्वारे कळविले आहे.-*-*-*-*-