सिद्धिविनायक मंदिरात भाविकांसाठी विशेष दर्शन…
मुंबई प्रतिनिधी-
मुंबईतील प्रसिद्ध श्री सिद्धिविनायक गणपती मंदिरात आज १२ ऑगस्ट २०२५ रोजी येणाऱ्या अंगारकी संकष्टी चतुर्थीच्या निमित्ताने भाविकांसाठी विशेष दर्शनाची व्यवस्था करण्यात आली आहे.या दिवशी रात्री ९.३० वाजता चांद्रदर्शन होणार असल्याने, चतुर्थीच्या व्रताचे संपूर्ण धार्मिक विधी – पूजा, अभिषेक, नैवेद्य व आरती – हे चांद्रदर्शनानंतरच करण्यात येणार आहेत. त्यामुळे रात्री उशिरापर्यंत मंदिरात भक्तांची मोठी गर्दी होण्याची शक्यता आहे.
सिद्धिविनायक मंदिर प्रशासनाने यासाठी विशेष तयारी केली असून, भाविकांना लवकर आणि सुरळीत दर्शन मिळावे यासाठी रांगा व्यवस्थापन, सुरक्षा व्यवस्था, स्वयंसेवकांची नेमणूक आणि सीसीटीव्ही निगराणी यांचा समावेश असलेली योजना राबवली जाणार आहे.मंदिरात ऑनलाईन दर्शनाची सुविधा देखील उपलब्ध करून देण्यात आली असून, जे भाविक प्रत्यक्ष मंदिरात उपस्थित राहू शकत नाहीत, ते ऑनलाइन प्लॅटफॉर्मवरून दर्शन घेऊ शकतील.
अंगारकी संकष्टीच्या पवित्र दिवशी श्री सिद्धिविनायकाच्या दर्शनासाठी हजारो भक्तांची उपस्थिती अपेक्षित आहे. मंदिर प्रशासनाने यासाठी सुयोग्य आणि भाविकाभिमुख व्यवस्था आखली आहे. भाविकांनी सहकार्य करत श्रद्धेने आणि संयमाने दर्शन घ्यावे, असे आवाहन करण्यात आले आहे.
