उद्योजक मेळाव्यासाठी नोंदणी करा – जिल्हाधिकारी अशोक काकडे
सांगली, प्रतिनिधी.) : जिल्हा कौशल्य विकास, रोजगार व उद्योजकता मार्गदर्शन केंद्र, सांगली व “दे आसरा फाऊंडेशन, पुणे यांच्या संयुक्त विद्यमाने दिनांक २५ सप्टेंबर, २०२५ रोजी सकाळी १० ते १ या वेळेमध्ये उद्योजक मेळाव्याचे आयोजन करण्यात आले आहे. हा मेळावा वसंतदादा पाटील इन्स्टिट्यूट ऑफ मॅनेजमेंट स्टडीज अॅण्ड रिसर्च, सांगली-मिरज रोड, सांगली यांचे स्व. डॉ. ए. डी. शिंदे सांस्कृतिक सभागृह येथे होणार आहे. जिल्ह्यातील सर्व उद्योजकांना मार्गदर्शन लाभावे व उद्योजक तरुण-तरुणींना व्यवसायाची प्रेरणा मिळावी यासाठी हा मेळावा घेण्यात येत आहे. या मेळाव्यात सहभागी होण्यासाठी इच्छुक उद्योजकांनी https://forms.gle/Xdy8N8wtvkMHhvkK7 या गुगल फॉर्ममध्ये नोंदणी करावी, असे आवाहन जिल्हाधिकारी अशोक काकडे यांनी प्रसिद्धीपत्रकाद्वारे केले आहे.
विविध क्षेत्रांतील सूक्ष्म, लघु व नवउद्योजक एकत्र आणून ज्ञानाची देवाणघेवाण करणे, नेटवर्किंगच्या संधी उपलब्ध करुन देणे तसेच व्यवसाय वाढीसाठी आवश्यक मार्गदर्शन करण्यासाठी आणि नवीन उद्योजक घडावेत व जिल्ह्याच्या अर्थव्यवस्थेस चालना मिळावी यासाठी उद्योजक मेळाव्याचे आयोजन करण्यात आले आहे.
00000
