जम्मू-काश्मीरच्या कुपवाडा जिल्ह्यातील नियंत्रण रेषेजवळ सुरक्षा दल आणि दहशतवाद्यांमध्ये झालेल्या एन्काऊंटर दोन दहशतवाद्यांचा खात्मा…
राज्य प्रतिनिधी
जम्मू काश्मीर कुपवाडा जिल्ह्यातील नियंत्रण रेषेजवळ सुरक्षा दल आणि दहशतवाद्यांमध्ये झालेल्या तीव्र चकमकीत दोन दहशतवाद्यांचा खात्मा करण्यात आला आहे. या भागात आणखी दहशतवादी लपल्याचा संशय असल्याने सुरक्षा दलांची संयुक्त शोध मोहीम सुरू आहे. संपूर्ण परिसराला वेढा घालण्यात आला असून, लष्कर आणि पोलिस दलांनी संयुक्तरीत्या कारवाई तीव्र केली आहे.
भारतीय लष्कराला मिळालेल्या गुप्त माहितीनुसार हे ऑपरेशन सुरू करण्यात आले. सुरक्षा दलांनी वारसन परिसरातील जंगल भागात शोधमोहीम हाती घेतली. या चकमकीदरम्यान दोन एके-श्रेणी रायफल्स, चार रॉकेट लाँचर्स, मोठ्या प्रमाणात दारूगोळा आणि अन्य युद्धसाहित्य जप्त करण्यात आले आहे. परिसरातील काही भाग अद्याप तपासाअंतर्गत असून, दहशतवादी गटाचे इतर सदस्य पळून गेले असण्याची शक्यता व्यक्त करण्यात येत आहे.
कुपवाडा जिल्ह्यात गेल्या काही महिन्यांपासून सीमेपलीकडून होणाऱ्या घुसखोरी आणि दहशतवादी हालचालींमध्ये वाढ झाली आहे. सुरक्षा दलांनी वेळोवेळी अनेक अशा कटांचा भांडाफोड केला असून, वारसन परिसरातील जंगलात दहशतवादी अड्डे उद्ध्वस्त करण्यात आले आहेत.
