*मतदार यादीत नाव कायम राहण्यासाठी एसआयआर कार्यक्रमांतर्गत मॅपींग करून घेणे अनिवार्य**मतदार याद्या सखोल पुनरिक्षण कार्यक्रमाला संपूर्ण सहकार्य करण्याचे नागरिकांना आवाहन*
नवी मुंबई प्रतिनिधी- निवडणुकीच्या मतदार याद्या अद्ययावत तसेच अधिक अचूक व पारदर्शक करण्यासाठी भारत निवडणूक आयोगाच्या वतीने मतदार याद्या विशेष सखोल पुनरिक्षण (Special intensive Revision – SIR) कार्यक्रम हाती घेण्यात आला आहे. या अंतर्गत सन 2024 च्या लोकसभा व विधानसभा निवडणूकीमध्ये तयार करण्यात आलेल्या मतदार यादीतील मतदारांच्या नावाची सन 2002 मधील अंतिम मतदार यादीतील मतदारांच्या नावाशी ताळमेळ घालण्याची कार्यवाही (SIR Mapping) सुरु करण्यात आलेली आहे.
विशेष सखोल पुनरिक्षण कार्यक्रम (SIR) काय आहे ? * मतदारांनी आपले नाव विद्यामान 2024-25 च्या मतदार यादीत असल्याची खातरजमा करून घेणे व सन 2002 मधील मतदार यादीतील नावाशी पडताळणी व जुळवणी करून घेणे.* सन 2024-25 मधील ज्या मतदारांची वयपूर्तता नसल्याने 2002 च्या मतदार यादीत नाव समाविष्ट नव्हते अशा मतदारांनी त्यांच्या नावाचे मॅपींग त्यांचे आई-वडील व वडीलांकडील आजी-आजोबा यांचे सन 2002 च्या यादीतील नावाशी करून घेणे.* ज्यांची नावे सन 2002 च्या मतदार यादीत नाही त्यांचेकडून प्रत्यक्ष SIR दरम्यान जन्माचे पुरावे घेणे
मॅपींग कशासाठी करावयाचे ? * याव्दारे भारतीय नागरिकत्वाची पडताळणी होणार असून मतदार यादीत नाव समाविष्ट करण्याची ही सर्वात महत्वाची अर्हता आहे.* नावाची पडताळणी व जुळवणी (Mapping) न केल्यास आपले नाव मतदार यादीत राहणार नाही.* याचा थेट परिणाम नागरिकत्वामुळे मिळणा-या लाभांवर होईल.* मतदार यादीशी जोडून राहण्यासाठी सन 2002 मधील मतदार यादीत आपले स्वत:चे नाव असण्याचे अथवा नाव नसल्यास आपले आई-वडील किंवा आजी-आजोबा यांच्या नावाचे पुरावे सादर करणे, त्यांची पडताळणी करून घेणे ही प्रक्रिया करावी लागणार आहे.* त्यामुळे मॅपींग करणे हे राष्ट्रीय कर्तव्य आहे याची जाणीव ठेवून प्रत्येक नागरिकाने मॅपींग करून घेणे गरजेचे आहे. या अनुषंगाने प्रत्येक मतदाराने 2002 च्या मतदार यादीतील आपले नाव व विद्यमान 2024 च्या यादीतील आपले नाव याची पडताळणी व जुळवणी (Mapping) करून घ्यायची आहे.
सुलभ मॅपींग प्रक्रिया * मॅपींग प्रक्रियेत voter.eci.gov.in या वेबसाईटला भेट द्यावी.* मग Search your Name in Last SIR हा पर्याय निवडून आपले नाव शोधावे.* जर 2002 च्या मतदार यादीत आपले नाव सापडले तर – आपला विधानसभा क्रमांक, यादी भाग क्रमांक, यादीतील अनुक्रममांक ही माहिती आपल्याकडे नोंद करून ठेवावी. यानंतर आपल्या क्षेत्रासाठी नियुक्त मतदान केंद्रस्तरीय अधिकारी (Booth Level Officer – BLO) यांचेसोबत या माहितीसह संपर्क साधावा आणि आपले विद्यमान यादीतील नाव 2002 च्या यादीतील नावाशी मॅपींग करून घ्यावे. * जर 2002 च्या मतदार यादीत आपले नाव सापडले नाही तर – आपले आईवडील किंवा आपले आजी-आजोबा यांचे नाव 2002 च्या मतदार यादीत असल्याची व त्यांचा विधानसभा क्रमांक, यादी भाग क्रमांक, यादीतील अनुक्रमांक ही माहिती आपल्याकडे नोंद करून ठेवावी. यानंतर आपल्या क्षेत्रासाठी नियुक्त मतदान केंद्रस्तरीय अधिकारी (Booth Level Officer – BLO) यांचेसोबत या माहितीसह संपर्क साधावा आणि आपले विद्यमान यादीतील नावाची मॅपींग प्रक्रिया करून घ्यावी.
मतदार यादीत असे शोधायचे नाव, मागील SIR मधील नाव शोधण्यासाठी https://voters.eci.gov.in/searchinSIR/S2UA4DPDF-JK4QWODSE या ECI Web Portal Link यामध्ये शोध घ्यावा * तसेच विद्यमान मतदार यादीत नाव शोधण्यासाठी https://electoralsearch.eci.gov.in/uesfmempmlkypo या ECI Web Portal Link यामध्ये शोध घ्यावा.* गुगल प्ले स्टोअर किंवा ॲप स्टोअर वरून ECI NET हे ॲप डाऊनलोड करून त्यात Search your Name in Voter List या पर्यायावर क्लिक करून सन 2024-25 च्या मतदार यादीतील आपल्या नावाची माहिती मिळवू शकता.* त्यानंतर Search your Name in Last SIR यावर क्लिक करून सन 2002 च्या मतदार यादीतील माहिती मिळवू शकता.* या दोन्ही माहिती मतदान केंद्रस्तरीय अधिकारी (Booth Level Officer – BLO) यांचेकडे द्यावी. बीएलओ यांची माहिती Connect with Election Official यावर सहज उपलब्ध आहे. बीएलओ यांच्याकडील ॲपमध्ये वरील दोन्ही माहिती भरल्यानंतर आपले मॅपींग पूर्ण होईल. मतदार याद्या विशेष सखोल पुनरिक्षण कार्यक्रमांतर्गत सध्या अस्तित्वात असलेल्या मतदार यादीतील अस्पष्ट, आकार विरहित व अमानवी छायाचित्रांशी पडताळणी करणे तसेच तर्कहीन चुका व अनाकलनीय नोंदींची वगळणी करणे, डेमोग्राफीकल सिमीलर इन्ट्रीजची पडताळणी करणे व वगळणी करणे अशी कामे बीएलओ यांच्यामार्फत करण्यात येत आहेत. या अंतर्गत नागरिकांनी स्वत:चे नाव 2002 च्या मतदार यादीत असल्याची खातरजमा करुन घेणे महत्वाचे आहे. त्या मतदार यादीत नाव नसेल अशा कमी वयाच्या नागरिकांनी आपले आई – वडील, आजी-आजोबा यांचे नाव सन 2002 च्या मतदार यादीत असल्याबाबतची खातरजमा प्रोजिनी पडताळणीव्दारे करुन घ्यावयाची आहे आणि ही माहिती बीएलओ ॲपमध्ये ऑनलाईन मॅपींग करण्यासाठी आपल्या विभागातील बीएलओ यांना उपलब्ध करुन द्यावयाची आहे. एकही पात्र मतदार हा मतदानापासून वंचित राहू नये व एकही अपात्र नाव मतदार यादीत असू नये हा या मोहीमेचा मुख्य उद्देश असून नागरिकांनी कोणतीही भिती न बाळगता स्वत: पुढाकार घेऊन मतदार यादीत आपले नाव तपासणे लोकशाहीच्या सबलीकरणासाठी महत्वाचे ठरणार आहे. *यापुढील काळात लवकरच मतदार यादीत नावे न आढळलेल्या मतदारांची नावे वगळण्याची कार्यवाही सुरु होणार असल्याने प्रत्येक मतदाराने सन 2002 च्या यादीशी आपले नाव लवकरात लवकर मॅपींग करुन घेणे महत्वाचे आहे. सदर पडताळणी न झाल्यास व मतदार यादीतून नाव वगळण्यात आल्यास पुन्हा नाव समाविष्ट करण्यासाठी नव्याने नोंदणी प्रक्रिया पार पाडावी लागेल याचीही नोंद नागरिकांनी घ्यावी व आपल्या नावाचे मॅपींग त्वरित करुन घ्यावे असे आवाहन श्री.सुनिल पवार, अतिरिक्त जिल्हा निवडणूक अधिकारी तथा अतिरिक्त आयुक्त नवी मुंबई महानगरपालिका यांच्या वतीने करण्यात येत आहे
