महाराष्ट्र कुस्ती संघटनेच्या जिल्हाप्रमुखपदी संजय मिसाळ
जालना प्रतिनिधी : जिल्ह्यातील नामवंत पैलवान संजय मिसाळ यांची महाराष्ट्र कुस्ती संघटनेच्या जालना जिल्हा प्रमुखपदी निवड करण्यात आली आहे. महाराष्ट्र कुस्ती संघटनेचे पैलवान संग्राम कांबळे यांच्या हस्ते पैलवान संजय मिसाळ यांना नियुक्तीपत्र देण्यात आले आहे
पैलवान संजय मिसाळ यांनी १९९२ ते १९९६ या कालावधीत पुणे येथील गोकुळ वस्ताद तालीम येथे गुरुवर्य रुस्तुम ए हिंद पै.हरिश्चंद्र बिराजदार यांच्या मार्गदर्शनाखाली कठोर सराव करत महाराष्ट्रातील अनेक नामांकित कुस्ती मैदानांमध्ये दमदार कामगिरी केली आणि ‘महाराष्ट्र चॅम्पियन’ हा मानाचा किताब पटकावला.
आजही ते जालना जिल्ह्यात स्वखर्चाने दरवर्षी कुस्ती मैदानाचे आयोजन करतात. अनेक गरीब व होतकरू पैलवानांना आर्थिक व सर्वतोपरी मदत करून त्यांना पुढे आणण्याचे कार्य ते सातत्याने करत आहेत. जालना जिल्ह्यात अधिकाधिक गुणवंत पैलवान घडावेत आणि कुस्तीची परंपरा अधिक बळकट व्हावी, यासाठी ते अविरत प्रयत्नशील आहेत.
महाराष्ट्र कुस्ती संघटनेला विश्वास आहे की, त्यांच्या अनुभव, नेतृत्व आणि कार्यतत्परतेमुळे जालना जिल्ह्यात कुस्ती चळवळीला नवी दिशा मिळेल. जालना जिल्ह्यात कुस्तीचा विकास, तालमींचे सक्षमीकरण आणि नवोदित पैलवानांना प्रोत्साहन देण्यासाठी महाराष्ट्र कुस्ती संघटना नेहमीच त्यांच्या पाठीशी ठामपणे उभी राहील, असा विश्वास महाराष्ट्र कुस्ती संघटनेचे पैलवान संग्राम कांबळे यांनी व्यक्त केला आहे.
000000
