सेवा सहकारी संस्थांना काम वाटपासाठी 20 जुलै पर्यंत प्रस्ताव सादर करण्याचे आवाहन

        सांगली, प्रतिनिधी : बेरोजगारांच्या सेवा सोसायटींना कामे वाटपासाठी जिल्ह्यातील 5 शासकीय कार्यालयाकडून कंत्राटी कामाकरिता जिल्हास्तरीय काम वाटप समितीकडे मागणी प्राप्त झाली आहे. काम करण्यास इच्छुक असणाऱ्या तसेच अटी व शर्ती पूर्ण करणाऱ्या सेवा सहकारी संस्थांनी काम मिळण्याबाबतचे प्रस्ताव दरपत्रकासह दि. 20 जुलै 2026 रोजी दुपारी 1 वाजेपर्यंत सादर करावेत, असे आवाहन जिल्हा कौशल्य विकास, रोजगार व उद्योजकता मार्गदर्शन केंद्राच्या सहायक आयुक्त इनुजा शेख यांनी प्रसिध्दीपत्रकाव्दारे केले आहे.

            शासकीय औद्योगिक प्रशिक्षण संस्था तासगाव, पलूस, विटा व आटपाडी यांच्याकडे प्रत्येकी एक सफाईगार व लोकशाहीर अण्णा भाऊ साठे शासकीय औद्योगिक प्रशिक्षण संस्था सांगली यांच्याकडे तीन सफाईगार अशी एकूण 07 सफाईगार कर्मचारी बाबत कामे आहेत. कामाचा कालावधी 11 महिन्याचा असून मोबदला प्रतिदिन 579 रूपये आहे (मा. कामगार आयुक्त यांच्याकडून वेळोवेळी प्रसिध्द करण्यात आलेल्या दरपत्रकानुसार).

अटी व शर्ती

बेरोजगारांची स्थापन केलेली सहकारी सेवा सोसायटी यांची स्थापना ही ऑगस्ट 2000 नंतर झालेली असावी. तसेच सहकार कायदा 1960 अन्वये नोंदणीकृत असावी. सहकारी सेवा सोसायटी नोंदणी प्रमाणपत्र आवश्यक आहे (प्रस्तावासोबत प्रत जोडावी).

सदर काम करणेस सहकारी सेवा सोसायटी सक्षम असावी व संस्थेच्या अधिनियमात उद्देश स्पष्ट केलेले असणे आवश्यक आहे (प्रस्तावासोबत प्रत जोडावी). सदर काम करण्यास सहकारी सेवा सोसायटी सक्षम असावी व संस्थेच्या अधिनियमात उद्देश स्पष्ट केलेले असणे आवश्यक आहे (प्रस्तावासोबत प्रत जोडावी). सहकारी सेवा सोसायटी सहा महिने कार्यरत असणे आवश्यक तसेच त्यांनी यापूर्वी काम केलेले असणे आवश्यक आहे, तसेच केलेल्या कामाचा तपशील कामाच्या रक्कमेसह देणे आवश्यक आहे. (प्रस्तावा सोबत मिळालेल्या कामाचा पुरावा जोडावा). संस्थेचे आर्थिक उलाढालीचे नियमित व अद्ययावत वार्षिक लेखा परिक्षण, लेखा परिक्षकांकडून केलेले (मार्च २०२६ अखेर) असणे आवश्यक आहे (प्रस्तावासोबत प्रत जोडावी). सेवा सोसायटीतील सदस्य क्रियाशील असणे आवश्यक आहे. संस्थेच्या उपविधीमध्ये काही बदल केले असतील तर सहकार खात्याच्या मान्यतेसह बदलाची प्रत असणे आवश्यक आहे (प्रस्तावासोबत प्रत जोडावी). संस्थेस शासकीय अनुदान प्राप्त झाले असल्यास अनुदान विनियोग प्रमाणपत्रासह लेखा परिक्षण अहवाल सादर करणे आवश्यक आहे (प्रस्तावासोबत प्रत जोडावी). संस्थेच्या सर्व सभासदांच्या चालू असलेल्या सेवायोजन नोंदणीची प्रत. सहकारी सेवा सोसायटीचे खाते सहकारी बँक / राष्ट्रीयकृत बँकेत काढलेले असावे. सदर अर्जासोबत उपविधीमध्ये नमूद असलेल्या कार्यक्षेत्राच्या पानाची साक्षांकित प्रत जोडावी. सर्व कागदपत्रांच्या छायांकित प्रती/प्रमाणपत्र मुळ प्रस्तावासोबत जोडणे आवश्यक आहे. प्रस्तावासोबत सदर कामाचे बंद लिफाफ्यामध्ये दरपत्रक सादर करावे. संस्था अवसायनात निघाली असेल तर प्रस्ताव सादर करण्यात येवू नये.

00000