कुंभे धबधबा व आजूबाजूच्या 1 कि.मी.परिसरात प्रतिबंधात्मक मनाई आदेश जारी…
रायगड-अलिबाग, प्रतिनिधी:- पोलीस निरीक्षक माणगांव यांनी सादर केलेल्या पत्रान्वये माणगांव तालुक्यातील मौजे कुंभे केळगण घाट, कुंभे धरण, कुंभे बोगदा हे पावसाळी हंगामात पुणे तसेच मुंबई व महाराष्ट्रातील पर्यटकांचे पर्यटनाचे आकर्षणाचे ठिकाण असून सदर ठिकाणी पर्यटकांची मोठया प्रमाणावर गर्दी होते. कुंभे धरण व धबधबा हे ठिकाण नैसर्गिक दुर्गम भागात असल्यामुळे तेथे सुरक्षेच्यादृष्टीने कोणत्याही उपाययोजना करण्यात आलेल्या नाहीत. त्याचप्रमाणे सन 2024 मध्ये ट्रेकिंगकरीता आलेल्या 05 पर्यटकांपैकी 01 महिला पर्यटक सेल्फी काढण्याचे मोहापाई डोंगर कड्यावरुन पडून मयत झाली होती. तसेच कुंभे बोगदा व त्यापुढील धबधबा या ठिकाणी व्यवस्थेचा अभाव असल्याने पर्यटकांना अनेक अडचणींना सामोरे जावे लागते व कुंभे घाट हा धोकादायक वळणांचा व तीव्र उताराचा असल्याने दरड कोसळ्याची संभाव्यता असल्याने पर्यटकांची वित्त व जिवीत हानी होऊ नये याकरीता सुरक्षेच्या व पर्यावरणाच्या दृष्टीने सदर ठिकाणी पर्यटकांना पर्यटनासाठी भारतीय नागरिक सुरक्षा संहिता, 2023 चे कलम 163 नुसार परिसरात पुढीलबाबींकरिता दि.03 जुलै ते दि.29 सप्टेंबर 2026 या कालावधीकरिता माणगाव उपविभागीय अधिकारी डॉ.संदीपान सानप यांनी प्रतिबंधात्मक मनाई आदेश जारी केला आहे.
या दरम्यान पर्यटकांकडून परिसरामध्ये मद्यपान करणे किंवा मद्यधुंद अवस्थेत प्रवेश करणे, मद्य बाळगणे, मद्य वाहतूक करणे, अनधिकृत मद्य विक्री करणे य उघडया जागेवर मद्य सेवन करणे. पावसामुळे धोकादायक झालेली ठिकाणे, धोकादायक वळणे, इ. ठिकाणी सेल्फी काढणे व कोणत्याही स्वरुपाचे चित्रीकरण करणे तसेच रहदारीवर परिणाम करणाऱ्या ठिकाणी तसेच धरण परिसरातील डोंगराच्या निमुळत्या टोकावर, उरडीवर जाऊन फोटोग्राफी करणे. वेगाने वाहणाऱ्या पाण्यात/खोल पाण्यात उतरणे व त्यामध्ये पोहणे. धबधब्याच्या धोकादायकरित्या पडणाऱ्या पाण्याच्या झोताखाली बसणे. वाहने अतिवेगाने व बेदरकारपणे चालविणे, तसेच ओव्हरटेक करणे किंवा रहदारीच्या ठिकाणी वाहने थांबविणे अशा प्रकारची कृत्ये पर्यटकांकडून केली जातात. याचबरोबर मोठ्या आवाजात संगीत यंत्रणा वाजवणे, गाडीमधील स्पिकर/ उफर वाजवून ध्वनी प्रदूषण निर्माण करणे, पर्यटनासाठी येणाऱ्या महिलांची छेडछाड करणे, टिंगलटवाळी करणे, महिलांशी असभ्य वर्तन करणे, शिवाय खाद्यपदार्थाच्या काचेच्या व प्लॉस्टिकच्या बाटल्या, थर्माकोलचे व प्लॅस्टीकचे साहित्य उघडयावर इतरत्र फेकणे अशीही कृत्ये पर्यटकांकडून केली जातात. धरण/तलाव/धबधब्याच्या 1 कि.मी. परिसरात दुचाकी/तीन चाकी/चार चाकी / सहा चाकी वाहनांनी प्रवेश करणे (अत्यावश्यक सेवा वगळून), या अशा प्रकारचे वर्तन करण्यास प्रशासनाने बंदी घातली आहे, याची नागरिकांनी गांभीर्याने नोंद घ्यावी, असे आवाहन माणगाव उपविभागीय अधिकारी डॉ.संदीपान सानप यांनी केले आहे.
0000
