पालकमंत्री डॉ. सुरेश खाडे यांच्याहस्ते प्रजासत्ताक दिनी मुख्य शासकीय ध्वजारोहण

 

 

 

        सांगली, प्रतिनिधी भारतीय प्रजासत्ताक दिनाच्या 74 व्या वर्धापन दिनाचे मुख्य शासकीय ध्वजारोहण कामगार मंत्री तथा सांगली जिल्ह्याचे पालकमंत्री डॉ. सुरेश खाडे यांच्याहस्ते होणार आहे. शुक्रवार, दिनांक 26 जानेवारी 2024 रोजी सकाळी 9.15 वाजता पोलीस परेड ग्राऊंड विश्रामबाग, सांगली येथे हा कार्यक्रम होणार आहे.

 

या कार्यक्रमास स्थानिक लोकप्रतिनिधी, स्वातंत्र्य सैनिक, शहिद जवानांच्या पत्नी व आईवडील यांनी उपस्थित रहावे. ध्वजारोहणाचा समारंभ सुरु होण्यापूर्वी 15 मिनिटे आसनस्थ व्हावे व सुरक्षिततेच्या दृष्टीने कोणतीही बॅग सोबत आणू नये, असे आवाहन जिल्हा प्रशासनातर्फे करण्यात आले आहे.

 

अधिकाधिक नागरिकांना हा सोहळा घरबसल्या पाहता यावा यासाठी नागरिकांनी बेवसाईटव्दारे होणारे थेट प्रक्षेपण पहावे. मुख्य शासकीय समारंभात निमंत्रितांना सहभागी होता यावे यासाठी दि. 26 जानेवारी 2024 रोजी सकाळी 8.30 ते 10 वाजेपर्यंतच्या दरम्यान ध्वजारोहणाचा किंवा इतर कोणताही शासकीय किंवा अर्धशासकीय समारंभ आयोजित करण्यात येवू नये. जर एखाद्या कार्यालयास अथवा संस्थेला आपला स्वत:चा ध्वजारोहण समारंभ करावयाचा असल्यास त्यांनी तो समारंभ सकाळी 8.30 च्या पूर्वी किंवा 10 वाजल्यानंतर करावा, असे आवाहन जिल्हा प्रशासनातर्फे करण्यात आले आहे.

 

00000