महिला व बाल विकास विभागाचे आवाहन
छत्रपती संभाजीनगर ,छत्रपती संभाजीनगर विभागातील आठही जिल्ह्यातील विविध प्रकारच्या अत्याचाराने पिडीत असलेल्या महिलांनी व अशा महिलांकरीता मदत करू इच्छिणाऱ्यांनी विभागीय कार्यालयाशी संपर्क साधावा असे आवाहन महिला व बाल विकास विभागाच्या विभागीय उपायुक्त हर्षा देशमुख यांनी एका प्रसिद्धीपत्रकान्वये केले आहे.
महिला व बाल विकास विभागाच्या छत्रपती संभाजीनगर विभागीय कार्यालय विभागीय उपायुक्त महिला व बाल विकास, ज्युबली पार्क चौक, सिटी सर्व्हे क्र.2974, प्लॉट क्र.5/5/53, पॅरामाऊंट स्टोअरमागे, छत्रपती संभाजीनगर येथे असलेल्या कार्यालया अंतर्गत छत्रपती संभाजीनगर, जालना, बीड, परभणी, नांदेड, हिंगोली, लातूर व धाराशिव या जिल्ह्यातील महिलांच्या तक्रारींचे तात्काळ निवारण होण्याच्या दृष्टीने महिलांना त्यांच्या इच्छेनुसार तज्ञ समुपदेशकांमार्फत समुपदेशन करण्यात येणार आहे. तसेच स्थानिक पोलीस स्टेशनकडून सहकार्य घेण्यात येईल.
अतिमहत्वाच्या गंभीर स्वरूपाच्या तक्रारी किंवा स्वाधिकार नोंद घेण्याच्या तक्रारीबाबत राज्य महिला आयोगाच्या सल्ल्याने कार्यवाही करण्यात येईल. आयोगाच्या विभागीय कार्यालयाद्वारे प्रस्तावित, नियोजित सुनावणी ऑनलाईन पद्धतीने घेण्यात येणार आहे.
छत्रपती संभाजीनगर विभागात येणाऱ्या जिल्ह्यातील विविध प्रकारच्या अत्याचाराने पिडीत असलेल्या महिलांनी व अशा महिलांकरीता मदत करू इच्छिणाऱ्यांनी div.aurangabad@gmail.com या ईमेलवर किंवा प्रत्यक्ष संपर्क साधावा असे आवाहन करण्यात आले आहे.
