जात प्रमाणपत्र पडताळणीचे अर्ज 31 जानेवारी 2025 अखेर सादर करा…
[ सांगली, प्रतिनिधी: सन 2024-25 या चालू शैक्षणिक वर्षात इयत्ता 12 वी विज्ञान शाखेमध्ये व पदविका तृतीय वर्षात शिकत असलेल्या अनुसूचित जाती, विमुक्त जाती, भटक्या जमाती, इतर मागासवर्ग, विशेष मागास प्रवर्ग व सा.शै.मा.प्र./मराठा (एससी, व्हीजे, एनटी, ओबीसी, एसबीसी, एसईबीसी) या संवर्गातील सर्व विद्यार्थ्यांनी विहित नमुन्यातील जात प्रमाणपत्र पडताळणीचा अर्ज त्यांच्या शैक्षणिक संस्थेच्या शिफारसीसह दि. 31 जानेवारी 2025 पर्यंत समिती कार्यालयाकडे सादर करावेत, असे आवाहन जिल्हा जात प्रमाणपत्र पडताळणी समितीचे संशोधन अधिकारी तथा सदस्य सचिव मेघराज भाते यांनी केले आहे.
सन 2025-26 या शैक्षणिक वर्षात अभियांत्रिकी, वैद्यकीय, कृषी, पशुसंवर्धन, वास्तुशास्त्र, फार्मसी, विधी (3 वर्षे / 5 वर्षे विधी), बी.बी.ए., बी.सी.ए., एम.बी.ए., एम.सी.ए. व बी. एड्. इत्यादी व्यावसायिक अभ्यासक्रमासाठी राखीव प्रवर्गात लाभ घेण्याकरिता संबंधित विद्यार्थ्यास प्रवेश प्रक्रिया नोंदणी अर्जासोबत जात वैधता प्रमाणपत्र अपलोड करणे अत्यावश्यक असते. त्याअनुषंगाने विद्यार्थ्यांनी जात प्रमाणपत्र पडताळणीचे अर्ज 31 जानेवारी 2025 पर्यंत सादर करण्याचे आवाहन करण्यात आले आहे. शैक्षणिक संस्थांनीही विद्यार्थी/ पालक यांच्यामध्ये जागरुकता निर्माण करुन समितीकडे मुदतीत अर्ज सादर करणेबाबत सूचना निर्गमित कराव्यात, असे पत्रकात म्हटले आहे.
अर्जदारांनी www.barti.maharashtra.gov.in cast validity या संकेतस्थळावर विहित नमुन्यातील ऑनलाईन अर्ज भरावा. महाविद्यालयीन शिफारसपत्र, 15 ए फॉर्मवर प्राचार्यांची सही, शिक्का व चालू वर्षाचे बोनाफाईड प्रमाणपत्र, जातीविषयक सर्व पुरावे व विहित नमुन्यातील शपथपत्रासह सर्व मूळ कागदपत्र ऑनलाईन अपलोड करावे व ऑनलाईन भरलेल्या अर्जाची हार्डकॉपी कागदपत्रांच्या/ पुराव्यांच्या साक्षांकित प्रतीसह समितीकडे सादर करावे. अर्ज सादर करतेवेळी अर्जदार/ पालक यांनी समक्ष मूळ कागदपत्रांसह उपस्थित रहावे, असे आवाहनही श्री. भाते यांनी केले आहे.
00000
