राज्यातील पर्यटकांसाठी मोठी खुशखबर-माथेरान मार्गावरील मिनी ट्रेन उद्यापासून पुन्हा सुरू…

नेरूळ प्रतिनिधी-

माथेरानला जाणाऱ्या पर्यटकांसाठी आनंदाची बातमी आहे. नेरळ-माथेरान मार्गावरील मिनी ट्रेन उद्यापासून पुन्हा सुरू होत आहे. सहा महिन्यांच्या प्रतीक्षेनंतर ही सेवा सुरू झाल्याने पर्यटकांना मोठा दिलासा मिळणार आहे.

माथेराच्या मिनी ट्रेनने प्रवास करू इच्छिणाऱ्या पर्यटकांची प्रतीक्षा संपली असून गुरुवारपासून नेरळ-माथेरान मार्गावरील मिनी ट्रेन सुरू होणार असल्याची घोषणा मध्य रेल्वेने केली. पावसाळ्यात प्रवाशांच्या सुरक्षेच्या दृष्टीने जून ते ऑक्टोबर दरम्यान ही मिनी ट्रेन बंद ठेवण्यात येते. पावसाळा संपल्याने ती पुन्हा सुरू होत आहे. तब्बल सहा महिन्यांनंतर ही सेवा पुन्हा सुरू होत असल्यामुळे पर्यटकांना मोठा दिलासा मिळणार आहे. सध्या अमन लॉज ते माथेरान या टप्प्यात शटल सेवा धावत आहेत.

मिनी ट्रेनला तीन द्वितीय, एक पारदर्शी, प्रथम आणि दोन द्वितीय श्रेणीसह सामानवाहू असे सहा डबे असणार आहेत. सोमवार ते शुक्रवारदरम्यान अमन लॉज ते नेरळदरम्यान रोज सहा फेऱ्या धावतात. शनिवारी आणि रविवारी संभाव्य गर्दी लक्षात घेऊन दोन फेऱ्या वाढवून एकूण आठ फेऱ्या चालवण्यात येतात.