ठाणे जिल्हाधिकारी कार्यालयात अत्याधुनिक आग नियंत्रण उपकरणाचे यशस्वी प्रात्यक्षिक!

ठाणे प्रतिनिधी-

ठाणे जिल्हाधिकारी कार्यालयाच्या प्रांगणात नुकतेच जागतिक दर्जाच्या अत्याधुनिक आग नियंत्रण उपकरणाचे अत्यंत प्रभावी प्रात्यक्षिक पार पडले! जिल्हाधिकारी डॉ. श्रीकृष्ण पांचाळ आणि निवासी उपजिल्हाधिकारी डॉ. संदीप माने यांच्या मार्गदर्शनाखाली जिल्हा आपत्ती व्यवस्थापन अधिकारी डॉ. अनिता जवंजाळ यांनी या विशेष कार्यक्रमाचे आयोजन केले होते.

मे. ब्लेझॉन फायर प्रा. लि. (दहिसर) या कंपनीने हे आधुनिक उपकरण विकसित केले असून शासकीय इमारती, गर्दीची ठिकाणे आणि आपत्कालीन परिस्थितीसाठी हे अत्यंत उपयुक्त ठरणार आहे. या प्रात्यक्षिकादरम्यान वर्ग A, B, C, D आणि E अशा सर्व प्रकारच्या आगींवर तात्काळ नियंत्रण मिळवण्याचे सादरीकरण करण्यात आले. लाकूड, पेट्रोल, तेल तसेच चालू इलेक्ट्रिक बोर्डवरील आगीवर काही सेकंदांत यश मिळवून याचे सामर्थ्य दाखवून देण्यात आले.

हे उपकरण वापरायला इतके सोपे आहे की अगदी लहान मुले आणि ज्येष्ठ नागरिकही ते सहज वापरू शकतात. याच्या वापरामुळे कोणताही धूर निर्माण होत नाही आणि ऑक्सिजनची मात्राही टिकून राहते, ज्यामुळे मानवी शरीराला कोणतीही हानी पोहोचत नाही. पारंपरिक उपकरणांच्या तुलनेत १० पट अधिक वेगाने काम करणारे हे तंत्रज्ञान प्रशासकीय सुरक्षा अधिक बळकट करण्यासाठी आणि मोठी जीवित व वित्तहानी टाळण्यासाठी अत्यंत मोलाचे ठरेल!