महाराष्ट्र एसटीच्या संपाने खासगी ट्रॅव्हल्स ‘गब्बर’ नागरिकांची उडाली तारांबळ कधी सुटणार प्रश्न?
नागपूर प्रतिनिधी: परवडणारे भाडे असणाऱ्या एसटीची संपामुळे चाके थांबली. याचा गैरफायदा खासगी ट्रॅव्हल्सवाल्यांनी घेतला. मनमानी भाडे आकारून प्रवाशांची लुट सुरू केली. जवळपास गेल्या दीड महिन्यांपासून प्रवाशी नाईलाजाने खासगी ट्रॅव्हल्सच्या तावडीत आहेत. भाड्याच्या दराचा बॅनर चक्क बसवर लावला आहे. संपामुळे सामान्य नागरिकांना खासगी बसने प्रवास केल्याशिवाय पर्याय नाही.
दुपारी ३ वाजताची वेळ, गणेशपेठ मध्यवर्ती बसस्थानकासोरील रस्त्यावरच ट्रॅव्हल्स उभ्या. भाड्याच्या मोठा बॅनर त्यांनी ट्रॅव्हल्सवर लावला. ‘लवकर बसा, नाहीतर बस निघून जाईल’ असे सुनावत ट्रॅव्हल्सवाले प्रवाशांना वाहनात कोंबतात. एसटी नसल्याने नागरिकांना ही मनमानी निमुटपणे सहन केल्याशिवाय पर्याय नाही. बाहेरगावला जाणाऱ्या आजीबाई असो किंवा कुटुंब ट्रॅव्हल्स चालकांचे भाडे ऐकूण जरा ‘हबकून’च जात होते.मात्र, नाईलाज असल्याने त्यांना ट्रॅव्हल्सच्या पायऱ्या चढाव्याच लागत होत्या. गरिब असणाऱ्या प्रवाशांचे ट्रॅव्हल्सवाल्यांना त्याचे काही देणे-घेणे नाही. त्यांची उर्मट भाषा प्रवाशांचा आणखी संताप वाढवित होती
