राज्यात एसटी कर्मचाऱ्यांनी आज भीक मांगो आंदोलन करत सरकारचं लक्ष वेधलं असतानाच नक्षलवाद्यांनीही एसटी कर्मचाऱ्यांच्या आंदोलनाला पाठिंबा दिला आहे
महाराष्ट्र प्रतिनिधी: राज्यात एसटी कर्मचाऱ्यांनी आज भीक मांगो आंदोलन करत सरकारचं लक्ष वेधलं असतानाच नक्षलवाद्यांनीही एसटी कर्मचाऱ्यांच्या आंदोलनाला पाठिंबा दिला आहे. गोंदिया जिल्ह्यातील सालेकसा येथील पोलीस ठाण्यापासून काही अंतरावरच नक्षलवाद्यांचे बॅनर आणि पत्रकं झळकली आहेत. नक्षलवाद्यांनी मुख्य रस्त्यावर बॅनर आणि पत्रकं लावून एसटी कर्मचाऱ्यांच्या आंदोलनाचं समर्थन केलं आहे. मात्र, या बॅनरमुळे शहरात खळबळ उडाली आहे.
गोंदिया जिल्ह्यातील सालेकसा येथे नक्षलांनी चक्क सालेकसा पोलीस ठाण्यापासून 1 किलोमीटर अंतरावरील सालेकसा-दरेकसा या मुख्य रस्त्यावर बॅनर लावले आहेत. त्याचबरोबर शारदा मंदिराच्या परिसरात पत्रकंही भिरकावण्यात आली आहेत
सालेकसा हा तालुका नक्षलग्रस्त भागात येतो. या ठिकाणी अनेकदा नक्षली चकमकी होतात. आज अचानक बॅनर आणि पत्रक आढळून आल्याने एकच खळबळ माजली आहे.
