राष्ट्रवादी पार्टीचे नेते नवाब मलिक यांचा अंतरिम जामीन रद्द करण्यासाठी मुंबई उच्च न्यायालयात याचिका दाखल…
मुंबई प्रतिनिधी -राष्ट्रवादी काँग्रेस पार्टी अजित पवार गटाचे नेते माजी आमदार नवाब मलिक मिळालेला अंतरिम जामीन रद्द करण्यासाठी मुंबई उच्च न्यायालयात याचिका दाखल करण्यात आली आहे. नवाब मलिक यांनी त्यांना अंतरिम जामीन मंजूर करताना न्यायालयाने घातलेल्या अटींचे थेट उल्लंघन केल्याचा आरोप स्थानिक रहिवाशी सॅमसन पठारे यांनी दाखल केलेल्या याचिकेत केला आहे
याबाबत प्राप्त माहितीनुसार –
किडनीवर उपचार घेण्यासाठी ऑगस्ट 2023 मध्ये सर्वोच्च न्यायालयाने त्यांना अंतरिम वैद्यकीय जामीन मंजूर केला होता. आता ते मानखुर्द शिवाजी नगर विधानसभा मतदारसंघातून महाराष्ट्र विधानसभेची निवडणूक लढवत आहेत, ज्यासाठी 20 नोव्हेंबर रोजी मतदान होणार आहे. मलिक यांनी त्यांना अंतरिम जामीन मंजूर करताना न्यायालयाने घातलेल्या अटींचे थेट उल्लंघन केल्याचा आरोप तक्रारदाराने दाखल केलेल्या याचिकेत केला आहे.
राष्ट्रवादी काँग्रेस पार्टी अजित पवार गटाचे नेते नवाब मलिक हे आपल्याला मिळालेल्या स्वातंत्र्याचा गैरवापर करत आहेत आणि साक्षीदारांना धमकावत आहे, त्याद्वारे त्यांच्यावर घातलेल्या जामीन अटींचा भंग होत असल्याचा आरोप केला गेला आहे.
निवडणूक प्रचाराच्या नावाखाली मलिक हे त्यांच्या अटकेच्या प्रकरणाशी संबंधित आणि परिचित असलेल्या साक्षीदारांसह ‘स्कोअर सेटल’ करत आहेत आणि विशेष पीएमएलए कोर्टासमोर साक्षीदारांना त्यांची भूमिका बदलण्यासाठी धमक्या देत आहेत’, असेही याचिकेत नमूद केले आहे. तसेच, निवडणुकीच्याप्रचारामुळे ते सतत पीएमएलए न्यायालयाच्या कार्यकक्षेबाहेर राहून प्रसारमाध्यमांना मुलाखतीही देत असल्याने पुन्हा त्यांच्या जामीन अटीचे उल्लंघन होत आहे. विशेष न्यायालयासमोरील खटल्याला जाणूनबुजून विलंब करून त्यांना दिलेल्या सवलतीचा गैरवापर करून ते योग्य न्यायापासून दूर जात आहे. यासह ते वेळोवेळी ईडीला आवश्यकतेनुसार वैद्यकीय तपशील देण्यास अपयशी ठरले आहेत.
