नेत्रदान पंधरवड्यानिमित्त जनजागृतीसाठी विविध उपक्रमांचे आयोजन
सांगली, प्रतिनिधी : जिल्ह्यात नेत्रदान पंधरवड्यानिमित्त 25 ऑगस्ट ते 8 सप्टेंबर 2025 या कालावधीत जनजागृती मोहिम राबविण्यात येत आहे. जिल्ह्यात 40 वा नेत्रदान पंधरवडा राबविला जात असून याचे औचित्य साधून शासकिय वैद्यकीय महाविद्यालय, मिरज येथे चित्रकला स्पर्धा, रांगोळी स्पर्धांचे आयोजन करण्यात आले. या स्पर्धेचे उद्घाटन शासकीय वैद्यकीय महाविद्यालय व रूग्णालयाचे अधिष्ठाता डॉ. प्रकाश गुरव, जिल्हा शल्य चिकित्सक डॉ. विक्रमसिंह कदम व नेत्रविभाग प्रमुख डॉ. शरद शेगावकर यांच्या हस्ते करण्यात आले.
या कार्यक्रम प्रसंगी वैद्यकीय अधीक्षक डॉ. रुपेश शिंदे, एफ.एम.टी. चे विभाग प्रमुख डॉ. बरदाळे, नेत्र विभागाच्या डॉ. अर्चना कसबे व डॉ. गायत्री वडगावे, डॉ. प्रियांका राठी, डॉ. मोमिन आदि उपस्थित होते.
अधिष्ठाता डॉ. प्रकाश गुरव यांनी नेत्रदान जनजागृतीसाठी केलेल्या कामाबद्दल कौतुक केले. जिल्हा शल्य चिकित्सक डॉ. विक्रमसिंह कदम यांनी जास्तीत जास्त नेत्र बुब्बुळ प्रत्यारोपण करण्याबाबत सूचित केले.
प्रास्ताविकात नेत्र विभाग प्रमुख डॉ. शरद शेगावकर यांनी सांगली जिल्ह्यात कार्यरत नेत्रपेढ्यांकडून 1296 नेत्रबुब्बुळे गेल्या 5 वर्षामध्ये गोळा करण्यात आली असून 761 नेत्रबुब्बुळांचे प्रत्यारोपण करण्यात आल्याचे सांगितले. त्याचबरोबर या नेत्रदान पंधरवड्यामध्ये पद्मभूषण वसंतदादा पाटील शासकिय रुग्णालयामध्ये मयत व्यक्तींच्या नातेवाईकांना नेत्रदान समुपदेशक अविनाश शिंदे यांनी समुपदेशन करुन 06 नेत्रबुब्बुळे गोळा केली व 15 लोकांचे बुब्बुळ प्रत्यारोपण करण्यात आल्याचे सांगितले.
यावेळी जिल्ह्यामध्ये जास्तीत जास्त नेत्रबुब्बुळे गोळा केल्याबददल अविनाश शिंदे यांचा पुष्पगुच्छ देवून सत्कार करण्यात आला.
चित्रकला व रांगोळी स्पर्धेतील प्रथम, व्दितीय व तृतीय क्रमांक प्राप्त स्पर्धकांना मान्यवरांच्या हस्ते प्रशस्तीपत्र देण्यात आले. सूत्रसंचालन डॉ. स्वप्नाली बंडगर यांनी केले
