रशिया चीनला तैवानवर आक्रमण करण्यासाठी गुप्तपणे युद्धकौशल्य, तंत्रज्ञान आणि अत्याधुनिक शस्त्रास्त्रांचे प्रशिक्षण…
विदेश प्रतिनिधी रशिया चीनला तैवानवर आक्रमण करण्यासाठी गुप्तपणे युद्धकौशल्य, तंत्रज्ञान आणि अत्याधुनिक शस्त्रास्त्रांचे प्रशिक्षण देत असल्याची धक्कादायक माहिती समोर आली आहे. रशिया चीनला आधुनिक युद्धाचे डावपेच शिकवत असून, त्यामुळे जागतिक पातळीवर नव्या युद्धाची भीती व्यक्त केली जात आहे.
रशिया आपल्या युद्धानुभवाचा उपयोग करून चीनच्या फायर कंट्रोल आणि गनिमी युद्धकलेचे प्रशिक्षण देत आहे. आठशे पानांच्या अहवालात नमूद केल्याप्रमाणे, रशियाने चीनला बीएमडी-चार-एम लाइट टँक, विशेष अँटी-टँक गन्स आणि एम्फीबियन टँक पुरवले आहेत. याशिवाय रशिया चीनमध्ये तंत्रज्ञान व देखभाल केंद्र स्थापन करणार असून, भविष्यात अत्याधुनिक हत्यारांच्या विकासासाठी हे केंद्र महत्त्वपूर्ण ठरणार आहे.
शी जिनपिंग यांनी 2027 पर्यंत तैवान ताब्यात घेण्याचे आदेश दिल्याचे वृत्त आहे. या पार्श्वभूमीवर चीनच्या लष्कराने मोठ्या प्रमाणावर तयारी सुरू केली आहे. रशिया चीनला केवळ सेना प्रशिक्षणच नव्हे तर हवाई, सागरी आणि सायबर युद्धासाठीही मार्गदर्शन देतो आहे, असेही अहवालात म्हटले आहे. त्यामुळे अमेरिका आणि पश्चिमेकडील देशांमध्ये मोठी चिंता निर्माण झाली आहे.
