महाराष्ट्राच्या जेम्स अँड ज्वेलरी क्षेत्राला नवी दिशा, ₹1,00,000 कोटींची गुंतवणूक आणि 50,000 रोजगारांची संधी-केंद्रीय गृह व सहकार मंत्री अमित शाह यांच्या हस्ते आणि मुख्यमंत्री देवेंद्र फडणवीस यांच्या प्रमुख उपस्थितीत आज बीकेसी, मुंबई येथे ‘52 व्या इंडिया जेम्स अँड ज्वेलरी अवॉर्ड्स’चे वितरण
राज्य प्रतिनिधी
केंद्रीय गृह व सहकार मंत्री अमित शाह यांच्या हस्ते आणि मुख्यमंत्री देवेंद्र फडणवीस यांच्या प्रमुख उपस्थितीत आज बीकेसी, मुंबई येथे ‘52 व्या इंडिया जेम्स अँड ज्वेलरी अवॉर्ड्स’चे वितरण करण्यात आले. यावेळी पुरस्कारप्राप्त मान्यवरांचे मुख्यमंत्री देवेंद्र फडणवीस यांनी अभिनंदन करत त्यांना शुभेच्छा दिल्या.
मुख्यमंत्री फडणवीस म्हणाले की, भारताच्या निर्यातीमध्ये जेम्स अँड ज्वेलरी क्षेत्राचा मोठा वाटा आहे. आज भारताच्या जेम्स अँड ज्वेलरी निर्यातीमध्ये सर्वांत मोठे योगदान महाराष्ट्राचे, मुंबईचे आणि येथे उपस्थित असलेल्या सर्वांचे आहे. येथील मालक आणि व्यापारी यांच्यासोबतच कारागीर आणि कर्मचारी हे सर्वजण एका कुटुंबाप्रमाणे एकत्रितपणे मेहनत करत आहेत. त्याचा परिणाम म्हणून आपला व्यापार $28 बिलियनपर्यंत पोहोचला असून, तो दरवर्षी वाढत आहे.
महाराष्ट्रात 2025 मध्ये नवीन जेम्स अँड ज्वेलरी पॉलिसी तयार करण्यात आली आहे. पारंपरिक व्यवसायासोबतच नवीन पिढीसाठीही या धोरणामध्ये विविध प्रकारच्या तरतुदी करण्यात आल्या आहेत. आता नवी मुंबईमध्येही जेम्स अँड ज्वेलरी पार्कसाठी जागा उपलब्ध करून देण्यात आली आहे. दसऱ्याच्या दिवशी तेथेही कामाला सुरुवात होईल. देशातील सर्वांत आधुनिक इकोसिस्टम उभी करत असून, या माध्यमातून ₹1,00,000 कोटींची गुंतवणूक तसेच 50,000 लोकांना रोजगार मिळेल. भारताच्या अर्थव्यवस्थेला मोठी चालना देणारी इकोसिस्टम या माध्यमातून उभी राहणार असल्याचे मुख्यमंत्री फडणवीस यांनी नमूद केले.
मुख्यमंत्री फडणवीस म्हणाले की भारत डायमंड बोर्स परिसरात आगामी काळात बांधकाम, उद्योग आणि रोजगार वाढणार असल्याने वाहतूक व्यवस्थेवर विशेष भर देण्यात येत आहे. मेट्रो स्थानकातून भारत डायमंड बोर्समध्ये थेट प्रवेश मिळावा, यासाठी नियोजन करण्यात येत आहे. तसेच वांद्रे आणि कुर्ला रेल्वे स्थानकांवरून पॉड टॅक्सी सेवा सुरू करून कर्मचारी आणि कारागिरांचा प्रवास अधिक सुलभ केला जाईल. बुलेट ट्रेन स्थानकाला कोस्टल रोड, वांद्रे-वरळी सी लिंक, छत्रपती शिवाजी महाराज आंतरराष्ट्रीय विमानतळाचे टर्मिनल-2 कुर्ला परिसर आणि उत्तर कोस्टल रोडशी जोडण्यासाठी टनेल मार्ग (बोगदे) उभारण्याचेही नियोजन आहे. रेल्वे, मेट्रो, रस्ते आणि विमानतळ अशा सर्व वाहतूक सुविधांशी भारत डायमंड बोर्सची अखंड जोडणी करण्यात येणार आहे. पंतप्रधान नरेंद्र मोदी यांच्या नेतृत्वाखाली जो नवा भारत घडत आहे, त्या नव्या भारतातील आधुनिक तंत्रज्ञानाचा वापर करून या सर्व सुविधा येथे उभारणार आहोत, असे मुख्यमंत्री फडणवीस यांनी नमूद केले.
