गेल्या सात ते आठ दिवसांपासून नाशिक जिल्ह्यातील कांदा व्यापारी संपावर आहेत. त्यांच्या मागण्यासाठी उपमुख्यमंत्री अजित पवार यांनी व्यापाऱ्यांच्या शिष्टमंडळासोबत बैठक घेतली. परंतु त्यात कोणताच तोडगा निघाला नव्हता. या बैठकीत व्यापाऱ्यांनी लिलाव बंद करू नये अशी विनंती करण्यात आली होती. परंतु जिल्ह्यातील कांदा मार्केटमध्ये लिलाव बंद कायम होती. त्यावर नाशिक जिल्ह्याचे पालकमंत्री दादा भुसे यांनी कठोर भूमिका घेत कारवाई करण्याचा इशारा दिला होता.

कांदा व्यापाऱ्यांनी पुकारलेल्या बेमुदत संपामुळे गेल्या सात दिवसांपासून नाशिक जिल्ह्यातील कांदा लिलाव बंद आहेत. कांदा व्यापाऱ्यांच्या या संपामुळे शेतकऱ्यांचा कांदा चाळीत पडला आहे. त्यामुळे तो सडण्याची शक्यता मंत्री दादा भुसे यांनी वर्तवली होती. नाशिक जिल्ह्यातील सर्व १५ बाजार समितीचे कांदा लिलाव ठप्प आहेत.

कांदा व्यापारी आपल्या मागणीवर ठाम असल्याने लिलाव बंद आहे. आपल्या मागणीसाठी नाशिक जिल्हा कांदा व्यापारी असोसिएशनचे अध्यक्ष खंडू देवरे यांनी बैठकीत अध्यक्ष पदाचा राजीनामा देण्याची तयारी दर्शवलीय. यामुळे सरकार आता काय कारवाई करते याकडे लक्ष लागले आहे.